Jergilikti atqarýshy organdar azyq-túlik ónimderi baǵasynyń ósýine jol bermeýi tiis. Bul týraly búgin Úkimettiń selektorlyq rejimdegi otyrysynda Premer-Ministr Baqytjan Saǵyntaev aitty, dep habarlaidy QazAqparat tilshisi.
«Áleýmettik mańyzy bar azyq-túlik túrleri baǵasynyń ósý problemasy halyq úshin óte mańyzdy másele. Sol sebepti azyq-túlik ónimderi baǵasynyń ósýine jol bermeýge eń aldymen jergilikti atqarýshy organdar jaýapty ekenin esterińizge salamyn. Ony ózderińiz de baiandamalaryńyzda aityp otyrsyzdar», - dedi Úkimet basshysy.
Osy rette Premer-Ministr oblys basshylaryna baǵany retteý úshin óńirlik turaqtandyrý qorlarynyń múmkindikterin tiimdi paidalaný, taýarlardy ýaqytynda satyp alý, jańartý jáne negizgi azyq-túlik túrlerin túgendeýdi der ýaqytynda júrgizýdi tapsyrdy.
«Osy jumystardyń barlyǵy sizderdiń turaqty baqylaýlaryńyzda bolýy qajet. Monitoringti kúsheitýdi qolǵa alýlaryńyzdy suraimyn», - dedi Baqytjan Saǵyntaev oblys basshylaryna.
