Jartyjyldyq ekspeditsiiadan keiin jerge qonǵan ǵaryshkerler qazaq dalasynyń ásemdigine tańdai qaqty, dep habarlaidy QazAqparat tilshisi.
Qaraǵandydaǵy «Saryarqa» áýejaiynda oblys ákimi Erlan Qoshanov ǵaryshkerler Sergei Ryjikov pen Andrei Borisenkony jáne NASA astronavy Robert Shein Kimbroýdy kútip aldy. Sol jerde baspasóz máslihaty ótkizilip, ǵaryshkerler orbitada ótken 173 kún sapary týraly áńgimelep berdi.
42 jastaǵy reseilik ǵaryshker Sergei Ryjikovtyń aitýynsha, jerge qoný kezinde ekipaj qazaq dalasynyń ásemdigine tamsanypty.
«Men stansada júrip, jer men aidyń kórinisin birneshe ret fotoǵa túsirdim. Qazaqstannyń dalasy sondai ásem - qýanyshqa bólep, kóz toidyrady», - dedi Sergei Ryjikov.
Keme komandiri Ryjikov ushqysh bolyp qyzmet etken, 2006 jyly ǵaryshkerler jasaǵyna alynǵan. Podpolkovnik áskeri ataǵy bar. Bul - Ryjikovtyń alǵashqy ǵarysh sapary.
«Soiýz MS-02» borttyq injeneri - 52 jastaǵy ǵaryshker Andrei Borisenko. Ol buryn ǵarysh kemelerin óndiretin "Energiia" zymyran-ǵarysh korporatsiiasynda jáne Ushýlardy basqarý ortalyǵynda jumys istegen.
Kemeniń ekinshi bortinjeneri - 49 jastaǵy amerikalyq astronavt Robert Shein Kimbroý. Ol - AQSh áskerinde ushqysh bolǵan jáne AQSh áskeriniń polkovnigi ataǵyn alǵan. «Soiýz MS-02» kemesimen ushýǵa deiin amerikalyq astronavt 2008 jyly "Indevor" shattlymen 15 kúnge ǵaryshqa ushqan jáne eki ret ashyq ǵaryshqa shyqqan.
Eske sala ketsek, 2017 jyldyń 10 sáýirinde Astana ýaqytymen 17:21-de «Roskosmos» apparatymen ǵaryshkerler Andrei Borisenko, Sergei Ryjikov jáne NASA astronavty Robert Shein Kimbroý Jezqazǵannan ońtústik shyǵysqa qarai 147 shaqyrym jerge qondy.
