AQSh Ulttyq aeronavtika jáne ǵarysh basqarmasy (NASA) kelesi aida úlken asteroidtyń jerge jaqyndaitynyn málim etti, dep habarlaidy QazAqparat Newsweek saityna silteme jasap.
NASA baǵalaýyna sai, 2001 CB21 asteroidy 4 naýryz kúni shyǵys ýaqyty boiynsha tańǵy 3:00-de Jerge jaqyn keledi. Aspan denesiniń diametri – 1,3 kilometr.
Onyń jyldamdyǵy - saǵatyna 26 800 milia bolmaq. Bul vintovkadan atylǵan oqtyń jyldamdyǵynan 13 ese, joiǵysh ushaqtyń maksimaldy jyldamdyǵynan 18 ese tez.
NASA-nyń Jerge jaqyn obektilerdi zertteý ortalyǵynyń (CNEOS) málimdeýinshe, alańdaýǵa sebep joq. Asteroid «yqtimal qaýipti» obektiler sanatyna jatady.
Alaida jaqyn arada ol Jermen betpe-bet kelmeidi, sebebi asteroid 3 million milia qashyqtyqta bolmaq.
Asteroidtyń «yqtimal qaýipti» bolyp belgilenýi onyń bizge soǵylatynyn bildirmeidi. Mundai ataýǵa Jerge óte jaqyn kelgen obektiler ie bolady.
2001 CB21 asteroidy Kúndi tolyǵymen 384 kúnde ainalady. Bul bizdiń ǵalamsharymyzdyń kórsetkishine jaqyn. Atalǵan asteroidtyń kólemi oǵan uqsas túrlerden edáýir úlken (97%).
30 qańtar kúni italiialyq astronom Djanlýka Masi 2001 CB21 asteroidynyń sýretin túsirdi. Oǵan sáikes, aspan denesi sol kezde Jerden 35 million kilometr qashyqtyqta bolǵan.
Al 6 naýryz kúni 2001 CB21 Jerge kezekti ret jaqyndamaq, ekeýiniń arasy 4,8 million kilometr bolady.
Eske sala keteiik, 1994 PC1 asteroidy 18 qańtar kúni Jerge jaqyn keldi. Onyń eni - 1 shaqyrym.
