Jerdi saýda men saiasattyń quralyna ainaldyrmaýymyz kerek. Mundai pikirdi búgin Senattyń jalpy otyrysynda jer qatynastaryn retteý máselelerin kózdeitin zań jobasyn talqylaý barysynda depýtat Murat Baqiiaruly bildirdi, dep habarlaidy QazAqparat.
«Qazaqtyń jeri - qazaqtyń jany men demi, tirshiligi, Táýelsizdigimizdiń tiregi. Jer - ultaralyq tatýlyqtyń negizi. Birneshe ǵasyrlar boiy otarlaý saiasatynyń zardabyn tartqan qazaq halqy sheteldikterge jerdi jalǵa berýdi qabyldai bermeitindikterine kózimiz anyq jetkendei boldy. Osy bir kóńil aýanyn eskerip, jerdi saýda men saiasattyń quralyna ainaldyrmaýymyz kerek. Jer taǵdyryna halyq alańdap otyr, «jer halyqtyń ortaq bailyǵy, jekeshelenbeidi, satylmaýy kerek» degen oi-pikirler buryn da, qazir de aitylyp keledi. Bizder muny eskerýimiz kerek. Sondyqtan da bolashaqta jerdi paidalanýdyń osy kezge deiin qoldanylyp kele jatqan jalǵa berý túrin ǵana negiz etip alǵanymyz durys», - dedi Murat Baqtiiaruly.
Al senator Tóleýbek Muqashev qazirgi ýaqytta aýyl turǵyndary jer ýchaskelerin rásimdeý úshin kóptegen kedergilerge tap bolyp otyrǵanyn aitty.
«Ásirese bul másele alshaq jerde ornalasqan aýyl turǵyndaryna óte qiyn. Sondyqtan aýyl ákimi jer ýchaskelerin jekemenshikke nemese ony paidalanýǵa berý qyzmetin óz moinyna alýy tiis. Osylaisha aýyl turǵyndary úshin ákimshilik tosqaýyldardyń qaýpi tómendeidi. Taǵy da bir másele, jer ýchaskesin shekti normasyn ulǵaitýdy qajet etedi. Ásirese, aýyldy eldi mekenderde oryndy bolyp tabylady. Sebebi, barshamyzǵa aýyldyń jaǵdaiy málim. Aýyl turǵynynyń kúnkórisi jermen bailanysty. Óziniń ýchaskesine jermen qosa qorasyn da, monshasyn da, saraiyn da turǵyzýy qajet», - dedi senator.
Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń hatshysy Rashit Ákimov jer qatynastaryn retteý máselelerin kózdeitin zańnyń qabylanýyna bailanysty Úkimettiń aldynda birqatar máseleniń turǵanyn atap ótti.
«Úkimet aldynda osy ótpeli kezeń dep otyrǵan ýaqyt aralyǵynda aýyl sharýashylyǵy jerlerine qatysty máselelerdi saiasi-ekonomikalyq jáne áleýmettik turǵydan saraptap, jan-jaqty zerdeleý mindeti tur. Keleshekte osy máselege bailanysty taǵy naqty usynystardyń bolary da anyq», - dedi Rashid Ákimov.
Aita keteiik, búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar engizý týraly» QR Zańy qabyldandy.
