QR Aýyl sharýashylyǵy ministrliginde QR Premer-Ministriniń orynbasary Eraly Toǵjanovtyń tóraǵalyǵymen Jer reformasy jónindegi komissiianyń kezekti, tórtinshi otyrysy ótti, dep habarlaidy "Ult aqparat" vedomstvonyń baspasóz qyzmetine silteme jasap.
Otyrys barysynda Komissiia músheleri jer qatynastaryn reformalaýǵa qatysty máseleler men usynystardy tyńdady. Bul suraqtar budan buryn jaýapty memlekettik organdardyń ókilderi men AÓK salasynyń mamandarynyń qatysýymen jumys toptarynda qaralǵan bolatyn.
Ashyq daýys berý qorytyndysy boiynsha jer reformasy jónindegi Komissiia Úkimetke usynys berýdi sheshti:
- jer zańnamasyna Qazaqstandyqtardyń aýyl sharýashylyǵy jerlerin uzaq merzimdi paidalaný quqyǵyn jańa merzimge jalǵa berýdi uzartý basym quqyǵymen 49 jylǵa deiingi merzimge saqtaý bóliginde tiisti ózgerister men tolyqtyrýlar engizilsin. Bul sheshim elimizdiń aýyl sharýashylyǵyn turaqty damytýdyń kilti bolady;
- Qazaqstandyqtardyń aýyl sharýashylyǵy maqsatyndaǵy jerlerdi memleketten satyp almai jaldaý quqyǵyn ielikten shyǵarý normasyn saqtaý jónindegi zańnamalyq aktilerge tiisti ózgerister engizý. Bul jerdi paidalaný quqyǵy naryǵyn qalyptastyra otyryp, aýyl sharýashylyǵy jerlerin ekonomikalyq ainalymǵa tartý tetigin iske qosýǵa múmkindik beredi;
- jaiylymdardyń jetispeýshiligi máselelerin sheshý úshin eldi mekenderdiń ainalasyndaǵy jaiylymdyq jerlerdiń tapshylyǵyna taldaý júrgizý;
- memlekettik organdardyń sheshimderi boiynsha ákimshilik shekaralar ózgergen jaǵdaida jeke jáne zańdy tulǵalarǵa jer ýchaskelerine sáikestendirý qujattaryn biýdjet qarjysy esebinen daiyndaý (respýblikalyq biýdjetti) qajettigi týraly normany zańnamalyq turǵydan bekitý.
Jer reformasy jónindegi Komissiia daýys berý arqyly birneshe usynysty qaraýdan alyp tastaý týraly sheshim qabyldady, óitkeni bul máseleler qoldanystaǵy zańnamada bar.
Onyń ishinde aýyl sharýashylyq jerlerin sýbarendaǵa berýge tyiym salý jáne latifýndisterdiń paida bolýyna jol bermeý úshin affiliirlengen tulǵalarǵa aýyl sharýashylyq jerlerin berýge tyiym salý týraly usynystar qaraýdan alynyp tastaldy.
«Jumys tobyna qatysa bermeitin kópshilikke osy kúnge deiin qansha másele qaralǵany týraly aqparat bergendi jón sanap otyrmyn. Komissiianyń ótken úsh otyrysynda bir emes, úsh emes, 91 suraq qaraldy. Tek búgin ǵana 4 suraqty qarap otyrmyz. 16 másele boiynsha naqty sheshim qabyldandy, zańnamalyq qyzmet aiasynda Parlamenttiń qaraýyna 28 usynys daiyndalýda, 47 suraq Úkimettiń sheshimin qabyldaýǵa jiberildi, taǵy 18 máseleni jumys toptaryndaǵy kún tártibinen alyp tastadyq. Komissiianyń ár otyrysynda biz naqty sheshimder qabyldadyq», - dep atap ótti Jer komissiiasy jumysynyń tiimdiligin baǵalaǵan QR Premer-ministriniń orynbasary Eraly Toǵjanov.
