Taiaýda oblys ákiminiń orynbasary Erbol Sadyr azamattardy jeke máseleleri boiynsha qabyldady. Qabyldaý barysynda azamattardyń jer máselelerinde sheshimin tappai júrgen túiitkildi problemalary tyńdaldy, dep jazady "Ult aqparat" OQO ákiminiń baspasóz qyzmetine silteme jasap.
Máselen, jeke qabyldaýǵa kelgen Shymkent qalasy, Abai aýdany, Kókbulaq eldi mekeniniń bir top turǵyndary Sairam aýdanynan berilgen jerdiń bas jospardyń ózgerip, Shymkent qalasyna ótýine bailanysty ol jer telimderine soǵylǵan úilerdiń buzylýyna narazylyq bildire kelipti. Birshama ýaqyttan beri sheshilmei kele jatqan jer daýynyń túp-tórkini mynadai. Baspanalar gaz qubyrynyń ústine soǵylǵandyqtan «QazTransOil» kompaniiasy úilerdi sot arqyly buzylýǵa sheshim shyǵarǵan.
Máseleniń mán-jaiyna qanyqqan Erbol Ábilqaiyruly jer teliminsiz qalǵan eldi meken turǵyndaryna Shymkent shaharynan jer beriletinin, al keltirilgen shyǵyndardyń óteletinin málimdedi. Jumystardyń jaqyn arada sheshimin tabatynyn jetkizgen oblys ákiminiń orynbasary jańadan qabyldanǵan Jer Zańyn da túsindire ketti.
Qabyldaýǵa kelgen kezekti azamattyń biri de Shymkentten. B.Mýhamedov esimdi turǵynnyń janaiqaiy da jer daýyna qatysty. Iaǵni, sot arqyly alynǵan 68 ga jerdiń máselesimen júrgen oǵan ákimdik tarapynan barlyq qajetti kómek pen qoldaýlardyń kórsetilgeni aitylyp, endigi kezekti jumystardy prokýratýra ókilderimen atqarý qajettigi túsindirildi.
Bul kúni E.Sadyrmen bolǵan jeke qabyldaýǵa joǵarydaǵy azamattar syndy 8 kisi qatysty. Oblys ákiminiń orynbasary baiandalǵan máselelerdi muqiiat tyńdap, tiisti mekeme basshylaryna olardyń sheshimin tabýy boiynsha naqty tapsyrmalar berdi.
