Ulttyq qoǵamdyq senim keńesi men Jer komissiiasynyń múshesi, qoǵam belsendisi Murat Ábenov Jer týraly zańnamaǵa engzililgen sońǵy ózgerister men túzetýler týraly pikir bildirdi, dep habarlaidy QazAqparat.
Sarapshy Facebook paraqshasynda búgin Prezident Qasym-Jomart Toqaev qol qoiǵan «Jer qatynastaryndaǵy ózgerister týraly» Zań jóninde pikir bildirdi.
«Shataspaý úshin basyn ashyp alaiyq. Mamyr aiynda Memleket basshysynyń bastamasymen jerdi sheteldikterdiń iemdenýine tyiym salatyn qujat qabyldanǵan bolatyn. Búgin qol qoiylǵan ekinshi qujatqa qoǵam ókilderi men sarapshylar qatysqan Jer komissiiasy usynǵan ózgerister engizilip otyr», - deidi qoǵam belsendisi.
Ulttyq keńes múshesi Memleket basshysynyń jer máselesine beijai qaramaityn halyqtyń paiymyn eskerip, jerge sheteldikterdiń ielik etýine tolyq tyiym salý týraly saiasi jaýapkershilikti óz moinyna alǵanyn, reformadaǵy ózge máselelerdi halyqtyń talqysyna qaldyrǵanyn eske salady.
«Komissiia ne sheshti? Onyń 5 otyrysy ótip, quramyndaǵy 80 adam 120-ǵa jýyq usynys engizdi. Men de osy komissiianyń quramynda boldym. Meniń ustanymym - aýyl sharýashylyǵy jerin tek QR azamattaryna jalǵa berý edi. Satýdyń kez-kelgen túri jerdi qarjy-ónerkásiptik toptardyń satyp alýyna jol ashady. Meniń ekinshi negizgi usynysym – jerdiń shynaiy ieleri týraly barlyq aqparatty ashý. Ras, bul túzetý úshin Úkimettegi latifýndister men lobbister jerdi tsifrlandyrý men kosmomonitoringke qoiylatyn talaptardy joiýǵa tyrysyp, sońyna deiin kúresip baqty. Daý uzaqqa sozyldy, sońynda ymyraǵa keldik. Biraq bul ymyra ýaqytsha dep aitar edim. Óitkeni suraqtardyń bir bóligi keiinge qaldy», - deidi Murat Ábenov.
Qoǵam belsendisi Jer komissiiasynyń usynystary negizinde qabyldanǵan zańnamalyq ózgeristerge toqtaldy.
«Ákimderden jer qatynastaryn baqylaý fýnktsiiasy alyndy, esesine jerge memlekettik baqylaýdy kúsheitý týraly sheshim qabyldandy. Buryn ákimderdiń qolynda bolǵan bul quzyret Jer resýrstaryn basqarý komitetine berildi.
Jerdi paidalaný maqsatyn ózgertýge tyiym salyndy: endi «baý-baqsha» jáne «saiajai qurylysyna» alynǵan jerler baqylaýdan bosatylmaidy.
Aýyl mańyndaǵy jaiylym jergilikti halyqtyń ortaq igiligine qaitarylady. Halyqtyń muqtajdyqtaryn eskere otyryp, jaiylymdyq jerlerdiń shekaralaryn anyqtaý jolǵa qoiylady», - deidi Jer komissiiasynyń múshesi.
Murat Ábenov kosmonitoring quraly arqyly eldegi latifýndisterdiń aty-jóni kópshilikke málim bolatynyna senimdi.
«Aýyl sharýashylyǵy jerlerin satýǵa tyiym salyndy. Biraq tyiymnyń merzimi – ázirge 5 jyl. Qazaqstandyqtarǵa aýyl sharýashylyǵy maqsatyndaǵy jerlerdi jekemenshikke berýge moratorii merzimi 2026 jylǵy 31 jeltoqsanǵa deiin uzartyldy.
Latifýndister ashyqtyqqa qarsy árket etip baǵady. Jerdiń kosmomonitoringin joiýǵa, ielerdiń attaryn ashqyzbaýǵa tyrysady. Biraq men qoǵam buǵan jol bermeidi dep senemin. Prezidenttiń Toqaev azamattardyń negizgi talaptaryn túsinip, qoǵam usynyp otyrǵan ózgeristerge bastamashy bolǵany jaqsy. Mundai jaǵdailarda azamattar men Prezidenttiń oiy bir jerden shyqqany mańyzdy.
Biraq arqany keńge salýǵa bolmaidy. Iri jer ieleri jańa normalarǵa shabýyldy bastap ketti. BAQ arqyly syni maqalalar jariialap, sarapshylar arqyly ózderine qolaily pikir qalyptastyrýǵa kúsh salyp jatyr.
Degenmen qoǵam keler urpaqtyń múddesin qorǵai alǵany úshin qýana alady. Árqaisymyz solardyń aldynda jaýaptymyz», - dep túiindedi Ulttyq keńes múshesi.
