Jer qoinaýyn paidalanýshylardyń aýdarymdarynyń bir bóligi mindetti túrde aýdandyq biýdjetke bólinedi, dep habarlaidy "Ult aqparat".
QR keibir zańnamalyq aktilerine biýdjet zańnamasyn jetildirý máseleleri boiynsha ózgerister men tolyqtyrýlar engizý týraly zań jobasy qaralǵan Parlament Májilisinde depýtat Káribai Musyrman Ulttyq ekonomika ministrligine joldady.
«Qoldanystaǵy Biýdjet kodeksine sáikes osyǵan deiin jer qoinaýyn paidalanýshylardyń óńirdiń áleýmettik-ekonomikalyq damýyna jáne onyń infraqurylymyn damytýǵa arnalǵan aýdarymdary tek oblystyq biýdjetke túsip keldi. Al qaralyp otyrǵan zań jer qoinaýyn paidalanýshylardyń aýdarymdarynyń bir bóligi – oblystardyń ǵana emes, aýdandardyń da áleýmettik-ekonomikalyq damýyna aýdarylýy qarastyrylyp otyr. Osyǵan orai sizge qoiar suraǵym: osy qarajatty aýdandyq deńgeige berý tártibi qandai bolady?» - dedi Káribai Musyrman.
Bul suraqqa jaýap bergen Ulttyq ekonomika vitse-ministri Ermek Alpysov qazirgi ýaqytta jer qoinaýyn paidalanýshylardyń aýdarymdary tolyǵymen oblystyq biýdjetke túsip jatqanyn rastady.
«Aýdandardyń aýmaǵynda arnaiy karerlar bolsa sol óńirde jergilikti ókiletti organdar infraqurylym jasaýy kerek. Sol tólemaqy arqyly bul jumys júrgizilýi tiis. Bul normativ oblystyq máslihattyń sheshimimen bekitiledi. Árbir aýdanǵa qandai mólsherde beriletini osylai sheshiledi», - dedi ol.
Májilis tóraǵasy Nurlan Nyǵmatýlin óz kezeginde bul normaǵa qatysty óz pikirin bildirdi.
«Buryn qalai edi? Iri kásiporyndardan bólinetin qarajat oblystyq biýdjetke ǵana kelip túsetin. Ar jaǵynda odan ary aýdandarǵa bere me, joq pa – ony oblystardyń basshylary sheshetin. Kezinde oblystardy basqarǵan kezde Omarhan Nurtaiulynan (Óksikbaev) biraz taiaq jedik. Esep komiteti suraý salatyn. Al osy jańa norma boiynsha túsken qarjy aýdandarǵa mindetti túrde bólinetin bolady. Tek máslihattyń sheshimi kerek. Bul – jergilikti atqarýshy organdar úshin óte mańyzdy norma», - dedi Májilis spikeri.
