QR Investitsiialar jáne damý ministri Jeńis Qasymbek poiyz apatyna bailanysty pikir bildirdi, dep habarlaidy QazAqparat.
«Komissiianyń basshylyǵy oqiǵa ornynda jumys istep jatyr. Tańerteńnen beri eksperimenttik sharalar júrgizildi. Óitkeni buqaralyq aqparat quraldarynda túrli nusqaldar sóz bolyp jatyr. Osy oraida búgingi eksperiment barysynda poiyzdardyń janama soqtyǵysýy aldyn ala rastalmady. Qazirgi kezde barlyq sebepter zerdelenýde», - dep toqtaldy vedomstvo basshysy.
Sonymen qatar ministr temirjol boiyndaǵy qozǵalys qalpyna keltirilgenin eske salyp ótti.
J. Qasymbektiń atap ótýinshe, poiyz apatynyń mán-jaiyna qatysty jáne ózge suraqtarǵa bailanysty arnaiy baspasóz máslihaty ótedi.
«Zardap shekkender men qaza bolǵan adamǵa qatysty ótemaqy boiynsha sheshim QTJ-men birlese jasalady. Jalpy, tekserý sharalary tiisti ýaqytty qajet etedi», - dedi Jeńis Qasymbek.
Munymen qosa ol komissiia ókilderi poiyz mashinisiniń is-qimyldaryna da baǵa beretinin jetkizdi.
«Kez kelgen kólik quraly, iaǵni temirjol jolaýshylar quramy mindetti túrde qajetti jóndeý jumystarymen jáne basqa da sharalarmen qamtylady. Atap aitqanda, bul talaptar qatań túrde oryndalady. Eger de poiyz jolǵa shyqsa, onda osy kólik tehnikalyq turǵyda durys bolǵanyn bildiredi», - dedi J. Qasymbek.
Eske sala ketsek, Jambyl oblysynda Astanadan Almatyǵa bara jatqan jolaýshylar poiyzy apatqa ushyraǵan bolatyn.
Sál keiinirek «Qazaqstan temir joly» ulttyq kompaniiasy «Astana-Almaty» baǵytynda qatynaityn poiyzdyń apatqa ushyraýyna qatysty resmi málimdeme jasap, oqiǵanyń shyǵý sebebin tekseretin arnaiy komiissiia qurylǵanyn jariia etken edi.
Jambyl oblystyq TJD baspasóz qyzmetiniń deregi boiynsha, túrli jaraqattarmen Shý aýdandyq ortalyq aýrýhanasyna 14 jolaýshy jetkizildi.
Qazir emdeý mekemesinde 48 jastaǵy Astana turǵynynan basqasy óz erikterimen aýrýhanadan shyqqan. Zardap shekken Astana turǵynynyń eki aiaǵy synyp, em qabyldap jatyr, dep túsindirdi óńirlik TJD baspasóz qyzmetiniń ókili Sáýle Munataeva.
