«Nurly jer» memlekettik baǵdarlamasynyń bir baǵyty ipotekalyq nesieniń mólsherlemesin tómendetýge arnalǵan. Ol úshin ipotekalyq zaimdardy sýbsidiialaý maqsatynda biýdjetten 10 mlrd teńge bólindi. Qazirgi kezde ol aqshanyń 4,3 mlrd teńgesi Qazaqstannyń ipotekalyq kompaniiasyna aýdaryldy, dep xabarlaidy "Ult aqparat" QazAqparat agenttigine silteme jasap.
«Búginde Batys Qazaqstan, Mańǵystaý, Shyǵys Qazaqstan men Aqmola oblystarynda, Astana men Almaty qalalarynda xalyqqa jeńildetilgen ipoteka berile bastady. Atalǵan baǵdarlamaǵa taǵy jeti bank qatysýǵa daiyn otyr. Sonyń ishinde tórt bank biyl 30 mlrd teńgeniń 2 myń zaimyn beremiz dep otyr. Degenmen, ekinshi deńgeili bankter áli kúnge deiin jeńildetilgen ipotekany berýge asyqpai otyr. Negizgi sebep - uzaqmerzimdi teńge valiýtasynyń bolmaýy. Oǵan ipoteka boiynsha zańnamanyń kúsheiýi de áser etip otyr», - dedi QR Investitsiialar jáne damý ministri Jeńis Qasymbek Úkimettiń búgingi otyrysynda.
Qazirgi kezde ipotekalyq nesielerdi sýbsidiialaý baǵdarlamasyna «Bank TsentrKredit» AQ, «ATF Bank» AQ jáne «Sberbank» AQ qatysyp, xalyqtan ótinish qabyldaýǵa kiristi. Al «Turǵyn úi qurylys jinaq banki» AQ, «Tengri Bank» AQ, «Tsesnabank» AQ, «Bank RBK» AQ, «Nurbank» AQ pen «VTB Banki» jyldyń ekinshi jartysynda atalǵan baǵdarlamaǵa qatysýdy kózdeidi.
Ministr Qasymbektiń aitýynsha, «Nurly jer» baǵdarlamasy aiasynda ipotekalyq nesieniń mólsherlemesin 17 protsentten 10 protsentke deiin azaitýǵa múmkindik bar.
Aita keteiik, otyrys barysynda ministr «Nurly jer» memlekettik baǵdarlamasy boiynsha jarty jyldyń ishinde salynǵan baspananyń sanyn jariialady. Sondai-aq, qai oblysta jer ýchaskeleriniń kóptep beriletinin jetkizdi.
.jpeg)