Qazaqstannyń Indýstriia jáne infraqurylymdyq damý ministrligi jeńildetilgen avtonesieleý baǵdarlamasyn qaita iske qosýdyń birneshe nusqasyn qarastyryp jatyr, - dep habarlaidy Tengrinews.kz tilshisi vedomstvonyń baspasóz qyzmetine silteme jasap.
Otandyq avtomobilderdi halyqqa qoljetimdi etý úshin Ministrlik jeńildikpen nesie berý baǵdarlamasyna biýdjetten qosymsha qarajat bólý máselesin pysyqtap jatyr. Budan basqa, Prezidenttiń tapsyrmasy boiynsha halyqqa jeńildikpen avtonesie berýdiń jańa baǵdarlamasy ázirlenetini habarlandy.
"Qazirgi ýaqytta baǵdarlamany qaita iske qosýdyń birneshe nusqalary qarastyrylyp jatyr. Sonyń birinde kóp balaly otbasylardy, kúsh qurylymdary qyzmetkerlerin, dárigerler men muǵalimderdi qoldaý jóninde baǵdarlama qosý usynylady.
Sondai-aq, "Birinshi otbasylyq avtomobil" kishi baǵdarlamasyn qosý múmkindigi qarastyrylǵan", - delingen habarlamada.
Eske salaiyq, jeńildetilgen avtonesieleý baǵdarlamasy 2015 jyly iske qosyldy. Ol 20 jylǵa eseptelgen jáne "revolverlik" ádiske negizdelgen. Qarjylandyrýdyń jalpy shegi - 82 milliard teńge. Baǵdarlama iske asyrylǵan sátten bastap revolverlik-qaitarymdy qarajatty eskere otyryp, 159 milliard teńgege 30 525 qaryz berildi. Qazirdiń ózinde 80 myńǵa jýyq adam otandyq avtokólikterdi satyp alǵan.
Jeńildikpen avtonesie berý baǵdarlamasynyń sharttary mynadai:
- 1 jeńil avtokólik quny 15 million teńgeden;
- nesie merzimi - 7 jyldan;
- sońǵy qaryz alýshy úshin nominaldyq syiaqy mólsherlemesi jyldyq 4 paiyzdan aspaýy tiis;
Sońǵy qaryz alýshy EDB aldyndaǵy nesiesin ótegen kezde qaitarylǵan qarajat esebinen otandyq óndiristiń jeńil avtokóligin satyp alýshylarǵa qaita nesie beriledi.
Búgingi tańda osy baǵdarlamamen satyp alý úshin elimizde qurastyrylǵan: Hyundai, KIA, JAC, Chevrolet jáne LADA siiaqty avtomobilder qoljetimdi.
Buǵan deiin "ÓKM Operatorynyń" shottarynan jeńildetilgen avtonesieleýge aqsha jiberilýi múmkin ekeni habarlanǵan edi.
