Qazaqstanda jeńildetilgen avtonesie berý sharttary anyqtaldy, - dep habarlaidy "Ult aqparat" Indýstriia jáne infraqurylymdyq damý ministrliginiń baspasóz qyzmetine silteme jasap.
Vedomstvo málimetinshe, Indýstriia jáne infraqurylymdyq damý ministrligi Ekologiia, geologiia jáne tabiǵi resýrstar ministrligimen birlesip, "Jasyl Damý" AQ qarajaty esebinen Qazaqstannyń azamattaryna jeńildetilgen avtonesie berý jáne avtobýs parkin jańartý boiynsha baǵdarlama ázirlep jatyr.
Jeńildetilgen nesie baǵdarlamasy boiynsha qarjylandyrý somasy shamamen 100 milliard teńgeni quraidy. Al Qazaqstan óńirlerindegi avtobýstar parkin jańartý úshin 30 milliard teńgege jýyq qarajat bólinedi.
Jeńil avtokólikti satyp alýǵa nesie berý tómendegi sharttar boiynsha júrgiziledi:
- syiaqy mólsherlemesi: 4 paiyz;
- nesielendirý somasy: 10 million teńgeden artyq emes;
- qarjylandyrý merzimi: 7 jyldan artyq emes;
- bastapqy jarna: 0 paiyzdan bastap;
- kólik quralynyń quny: 15 million teńgeden aspaidy.
Nesie berýdi ekinshi deńgeidegi bankter júzege asyrady. Baǵdarlama 2022 jylǵy sáýirdiń aiaǵynda iske qosylady.
"Qarjylandyrýdyń ashyqtyǵyn qamtamasyz etý úshin ministrliktermen mindetti shart kózdelgen. Oǵan sáikes EDB-de qaryz alýshylarǵa qarjylandyrýdy usynýdyń mártebesi men merzimin qadaǵalaýdyń avtomattandyrylǵan júiesi bolýy tiis", - delingen habarlamada.
Sondai-aq qaryz alýshyǵa eki jyldyń ishinde bir retten artyq avtonesie alýǵa tyiym salatyn shekteý engizilgen.
