Jeńildetilgen avtonesiege ótinish bergen 4290 qazaqstandyqtyń ótinishi oń sheshimin taýyp, 31,7 mlrd teńge kóleminde nesie bekitildi. Bul týraly «Ónerkásipti damytý qory» AQ basqarma tóraǵasynyń orynbasary Janar Ibrasheva málim etti, dep habarlaidy QazAqparat.
«Qazir jeńildetilgen avtonesie berý jumysy qarqyndy júrip jatyr. Azamattar ótinishin ekinshi deńgeili bankter qabyldap jatyr. Qazirgi sátte 4290 azamattyń ótinishi oń sheshimin tapty. Oǵan bólingen nesieniń kólemi 31,7 mlrd teńgeni qurap otyr. Búginde «Bank TsentrKredit», Halyk Bank jáne Eýraziia banki ótinish qabyldap jatyr. Erteńnen bastap bul qatarǵa Forte Bank qosylady dep otyrmyz», - dedi Janar Ibrasheva.
Onyń aitýynsha, avtonesiege ótinish berý jumysy el kóleminde júrip jatyr.
«Statistika únemi ózgerip turady. Joǵaryda aitylǵan málimet - qazirgi jait. Jeńildetilgen avtonesie kádimgi nesie alý sekildi. Iaǵni, aldymen klienttiń nesieni óteý múmkindigi qaralady. Sondyqtan da kei klientterdiń ótinishi keri qaitarylýy múmkin. Bul týraly tolyǵyraq bankterden bilý kerek. Avtokólikke qol jetkizý de ár jaǵdaiǵa bailanysty. Klient avtosalonǵa kelip kólikti qaraidy, eger qalaǵan mashinasy bar bolsa, sol jerde birden rásimdeidi. Eger klient qalaǵan avtokólik joq bolsa, onda kútedi», - deidi ol.
Atalǵan qordyń málimetinshe, avtonesiege ótinish berýshiler boiynsha Almaty qalasy kósh bastap tur. Odan bólek, úshtikke Túrkistan oblysy jáne Nur-Sultan qalasy kirip otyr.
