BUU Jeneva bólimshesinde qazaqtyń uly aqyny Abai Qunanbaiulynyń 175 jyldyǵyna jáne Birikken Ulttar Uiymynyń 75 jyldyǵyna arnalǵan biýstiń saltanatty ashylýy ótti, dep habarlaidy QR SIM baspasóz qyzmeti.
Is-sharaǵa bólim basshylyǵy men qyzmetkerleri, birqatar BUU-ǵa múshe memleketterdiń ókilderi qatysty.
Saltanatty sharaǵa qatysýshylardyń nazaryna Prezident Qasym-Jomart Toqaevtyń BUU Bas Assambleiasynyń 75-shi sessiiasynda Abaidyń 175 jyldyǵyna arnalǵan baiandamasynan úzindiler jáne Abaidyń tarihi otanynda oǵan ashylǵan eskertkish týraly film usynyldy.
BUU-nyń Jenevadaǵy bólimshesiniń Bas direktory Tatiana Valovaia BUU-nyń 75 jyldyǵyna orai Ulttar saraiynyń tarihi ǵimaratynda biýsttiń ashylýynyń simvoldyq máni bar ekenin atap ótti. Ol qazaqstandyqtardy Táýelsizdik kúnimen quttyqtap, eldiń halyqaralyq saiasattaǵy, ekonomikalyq, áleýmettik jáne mádeni damýdaǵy mańyzdy róli men jetistikterin atap ótti. T.Valovaia uly aqyn, oishyl jáne kompozitor Abaidyń shyǵarmashylyq murasynyń tek memleketimiz úshin ǵana emes, búkil Eýraziia óńiri úshin mańyzy zor ekenin, sondai-aq Batys jáne shyǵys mádenietin biriktiretin kópir bolyp tabylatynyn, mysal retinde Abaidyń Lermontovtyń qazaq tiline aýdarmalary arqyly nemis aqyny Giote shyǵarmashylyǵyn taratýdaǵy rólin keltiretinin atap ótti.
Qazaqstannyń Jenevadaǵy BUU janyndaǵy Turaqty ókili Janar Aitjanova óz ómirin aǵartýshylyqqa arnaǵan Abaidyń 175 jyldyǵy biyl búkil álemde keńinen atap ótilgenin aityp ketti. Onyń aitýynsha, Abai shyǵarmashylyǵy elder men halyqtardyń jaqyndasýyna yqpal etti, onyń toleranttylyq, mahabbat ideialary BUU-nyń 75 jyldyǵynda asa ózekti bolyp tabylady. Qazaqstandyq diplomat Abaidyń biýstin ornatý úshin qarýsyzdaný jónindegi konferentsiianyń májilis zalyna qarama-qarsy oryndy tańdaýdyń simvoldyq mánin atap ótip, Abaidyń «Adamzattyń bárin súi baýyrym...» dana qara sózderi BUU qoǵamdastyǵyna izet, beibitshilikti, birlikti jáne kópjaqty diplomatiiany nyǵaitýǵa yqpal etetinine senim bildirdi.
