Memleket jáne qoǵam qairatkeri, belgili saiasattanýshy Aidos Sarym Qazaqstanda sybailas jemqorlyqpen kúreske arnalǵan detektivti kitap jazyp, film túsirý ideiasyn usyndy, dep habarlaidy QazAqparat.
«Biz sottalǵan, memlekettiń qarajatyn jep aiypty bolǵandardy búkil el aldynda qarabet qylýymyz kerek. Iaǵni, halyq kináli azamattyń esimin ǵana emes onyń elge keltirgen ziianyn da bilýi tiis. Sybailas jemqorlyqqa qatysty elimizde aitatyn, jazatyn dúnie jetkilikti. Osy oraida meniń usynysym, múmkin agenttik sybailas jemqorlyqqa qarsy baǵytynda halyq arasynda úgit-nasihat júrgizip qana emes, qarajat bólip, detektiv janrynda kitap jazylyp, film túsirilse. Oǵan negiz bolatyn sybailas jemqorlyq derekteri men qylmystyq ister jetip jatyr», - dedi Aidos Sarym QR Sybailas jemqorlyqqa qarsy qyzmeti agenttiginde ótken onlain konferentsiia barysynda.
Qoǵam qairatkeriniń pikirinshe, sybailas jemqorlyqpen kúreste detektivti kitap men film arqyly nasihattaý tiimdi quraldardyń biri.
«Álemde eń kóp satylatyn jáne joǵary suranys pen oqylymǵa ie kitap janry ol - detektiv. Ózderińiz biletindei kitap, film degen ol belgili bir dúnieni nasihattaýdyń quraly, ol arqyly kez kelgen nárseni jaqsy qylyp kórsetýge de bolady nemese kerisinshe. Basqasha aitqanda bul mádenietke kelip tireledi. Siz ben bizdiń osy qazir aityp otyrǵan áńgimemiz osy jerde qalady, al mazmuny jaqsy kitap pen film - máńgilik», - dedi Aibos Sarym.
