Ulttyq testileý ortalyǵyna nemese UBT-ǵa qatysty kez kelgen jemqorlyq faktileri týraly habarlaǵandarǵa syiaqy beriledi. Osy oraida, 100 myń teńge somasyndaǵy syiaqyny QR BǴM Ulttyq testileý ortalyǵynyń direktory mindetin atqarýshy Didar Smaǵulov óz qaltasynan tóleýge daiyn ekenin málim etti, dep habarlaidy QazAqparat.
«Áleýmettik jelilerde Ulttyq testileý ortalyǵy testilerdi satyp jatyr degen qaýesetter taraǵan bolatyn. Bul rette osy tektes aqparattardy joqqa shyǵarǵym keledi. Ortalyqtaǵy qyzmetkerlerdiń, áriptesterimniń óz isine adal ekenin senimmen aita alamyn. Ókinishke qarai, áleýmettik jelide test jaýaptary satylyp jatqandyǵy týraly jii aitylady. Tekserý nátijesinde bul jalǵan aqparat bolyp shyǵady nemese birneshe jyl burynǵy testiler ekeni anyqtalady», - dep toqtaldy D. Smaǵulov jemqorlyqpen kúres sharalaryna arnalǵan keńeste.
«Ózderińiz bilesizder, sybailas jemqorlyq faktilerin habarlaǵany úshin yntalandyrý bar. Budan bólek, jemqorlyq faktisi boiynsha 100 myń teńge somasynda syiaqy engizbekpiz. Bul biýdjet qarjysynan tólenbeidi, bul somany ózimniń jeke qarajatymnan bólemin. Bizdiń saladaǵy jemqorlyqqa qatysty kez kelgen naqty aqparatty habarlaǵandarǵa atalǵan syiaqyny berýge daiynmyn. Atap aitqanda, óz áriptesterimniń taza ekenine senimdimin. Osy kisilermen jarty jyldan astam ýaqyt jumys istep kelemin», - dedi Ulttyq testileý ortalyǵynyń direktory mindetin atqarýshy.
Osy oraida, jemqorlyqqa qatysty habarlaǵan adamdardyń qupiialyǵy saqtalatynyn jetkizdi.
«Áleýmettik jelilerde meniń paraqshalarym ashylǵan, telefon nómirleri de kórsetilgen. Biz jemqorlyq faktileri týraly aqparatty syiaqy tólep qabyldaýǵa daiynbyz. Keiinnen bul málimetter Sybailas jemqorlyqqa qarsy is-qimyl agenttigine tapsyryp, bul turǵyda qajetti sharalar qabyldanady», - dedi Didar Smaǵulov.
