ۇلتتىق تەستٸلەۋ ورتالىعىنا نەمەسە ۇبت-عا قاتىستى كەز كەلگەن جەمقورلىق فاكتٸلەرٸ تۋرالى حابارلاعاندارعا سىياقى بەرٸلەدٸ. وسى ورايدا, 100 مىڭ تەڭگە سوماسىنداعى سىياقىنى قر بعم ۇلتتىق تەستٸلەۋ ورتالىعىنىڭ ديرەكتورى مٸندەتٸن اتقارۋشى ديدار سماعۇلوۆ ٶز قالتاسىنان تٶلەۋگە دايىن ەكەنٸن مەلٸم ەتتٸ, دەپ حابارلايدى قازاقپارات.
«ەلەۋمەتتٸك جەلٸلەردە ۇلتتىق تەستٸلەۋ ورتالىعى تەستٸلەردٸ ساتىپ جاتىر دەگەن قاۋەسەتتەر تاراعان بولاتىن. بۇل رەتتە وسى تەكتەس اقپاراتتاردى جوققا شىعارعىم كەلەدٸ. ورتالىقتاعى قىزمەتكەرلەردٸڭ, ەرٸپتەستەرٸمنٸڭ ٶز ٸسٸنە ادال ەكەنٸن سەنٸممەن ايتا الامىن. ٶكٸنٸشكە قاراي, ەلەۋمەتتٸك جەلٸدە تەست جاۋاپتارى ساتىلىپ جاتقاندىعى تۋرالى جيٸ ايتىلادى. تەكسەرۋ نەتيجەسٸندە بۇل جالعان اقپارات بولىپ شىعادى نەمەسە بٸرنەشە جىل بۇرىنعى تەستٸلەر ەكەنٸ انىقتالادى», - دەپ توقتالدى د. سماعۇلوۆ جەمقورلىقپەن كٷرەس شارالارىنا ارنالعان كەڭەستە.
«ٶزدەرٸڭٸز بٸلەسٸزدەر, سىبايلاس جەمقورلىق فاكتٸلەرٸن حابارلاعانى ٷشٸن ىنتالاندىرۋ بار. بۇدان بٶلەك, جەمقورلىق فاكتٸسٸ بويىنشا 100 مىڭ تەڭگە سوماسىندا سىياقى ەنگٸزبەكپٸز. بۇل بيۋدجەت قارجىسىنان تٶلەنبەيدٸ, بۇل سومانى ٶزٸمنٸڭ جەكە قاراجاتىمنان بٶلەمٸن. بٸزدٸڭ سالاداعى جەمقورلىققا قاتىستى كەز كەلگەن ناقتى اقپاراتتى حابارلاعاندارعا اتالعان سىياقىنى بەرۋگە دايىنمىن. اتاپ ايتقاندا, ٶز ەرٸپتەستەرٸمنٸڭ تازا ەكەنٸنە سەنٸمدٸمٸن. وسى كٸسٸلەرمەن جارتى جىلدان استام ۋاقىت جۇمىس ٸستەپ كەلەمٸن», - دەدٸ ۇلتتىق تەستٸلەۋ ورتالىعىنىڭ ديرەكتورى مٸندەتٸن اتقارۋشى.
وسى ورايدا, جەمقورلىققا قاتىستى حابارلاعان ادامداردىڭ قۇپييالىعى ساقتالاتىنىن جەتكٸزدٸ.
«ەلەۋمەتتٸك جەلٸلەردە مەنٸڭ پاراقشالارىم اشىلعان, تەلەفون نٶمٸرلەرٸ دە كٶرسەتٸلگەن. بٸز جەمقورلىق فاكتٸلەرٸ تۋرالى اقپاراتتى سىياقى تٶلەپ قابىلداۋعا دايىنبىز. كەيٸننەن بۇل مەلٸمەتتەر سىبايلاس جەمقورلىققا قارسى ٸس-قيمىل اگەنتتٸگٸنە تاپسىرىپ, بۇل تۇرعىدا قاجەتتٸ شارالار قابىلدانادى», - دەدٸ ديدار سماعۇلوۆ.
