QR Sybailas jemqorlyqqa qarsy is-qimyl agenttigi jedel-tergeý bólimsheleriniń qyzmetkerlerine turǵyn úi tólemderi belgilenedi. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
«Zańmen sybailas jemqorlyqqa qarsy is-qimyl jónindegi ýákiletti organnyń jedel-tergeý bólimsheleriniń qyzmetkerlerine turǵyn úi tólemderi belgilenedi. Turǵyn úi máselesin sheshý, qyzmetkerlerdiń tiisti ýájdemesin qamtamasyz etý maqsatynda ǵana emes, sondai-aq sybailas jemqorlyq táýekelderiniń aldyn alý úshin de mańyzdy bolyp sanaldy. Zańmen 3 Kodekske, 7 zańǵa túzetýler engizildi», - dedi Oljas Bektenov Ortalyq kommýnikatsiialar qyzmetindegi baspasóz máslihatynda.
Sonymen qatar ol Memleket basshysy memlekettik qyzmetshilerge, depýtattar men sýdialarǵa sheteldiń bankterde esepshot ashýǵa, qundy zattar saqtaýǵa tyiym salý, sybailas jemqorlyq qylmys jasaǵan tulǵalardy shartty túrde merziminen bosatýǵa jol bermeý, para berýshiler men paraqorlyqqa deldaldarǵa jaýapkershilikti kúsheitý týraly tapsyrma bergenin eske saldy.
«Qazirgi ýaqytta agenttik múddeli memlekettik organdarmen bilesip, el Prezidentiniń tapsyrmalaryn jedel zańnamalyq júzege asyrý baǵytynda jumys istep jatyr», - dedi Oljas Bektenov.
Aita keteiik, keshe Memleket basshysy «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoiǵan edi.
