Jelide ómir boiyna bas bostandyǵynan aiyrylǵan aqtóbelik terroristerdiń jańa videosy paida boldy. Aqpanbetov Álibek, Qýanyshbaev Baqyt, Rahmetov Ashat jáne Tańatarov Arsen istegen isterine ókinetinin aityp, jaqyndarynan keshirim suraidy, - dep habarlaidy kaz.tengrinews.kz.
"Men eń birinshi kezekte ata-anany tyńdaýǵa keńes berer edim. Olar jamandyq tilemeidi, - deidi Rahmetov Ashat. - Olar seniń adam bolýyńdy qalaidy, alańdaidy. Al biz kóshede júrip tárbie alamyz, asyǵys sheshim qabyldap, aqparattyń barlyǵyn kósheden alamyz. Ata-analaryń tiri bolǵanda, qadirleńder, aitqandaryn tyńdańdar".
Sottalǵan jigit osy áreketine ókinetinin jáne qazir anasyna kómektese almai otyrǵanyn aityp otyr. "Anam egde jastaǵy kisi, jasy 50-den asty. Men oǵan qamqorlyq kórsetýim kerek. Endi ǵana úi sala bastaǵan edik, biraq, árine, ony soǵyp aiaqtamadyq. Men olarǵa úidi soǵýǵa kómektesýim kerek edi. Anam meni 28 jyl boiy tárbieledi, ósirdi, kiindirdi, orta bilim berdi. Ol qolynan kelgeniniń barlyǵyn jasady. Osynyń barlyǵyn men isteýim kerek edi. Árine, men bul úshin qatty uialamyn, yńǵaisyzdanamyn. Ata-anany baǵalaý kerek, olarǵa qamqorlyq kórsetý kerek", - deidi ol. Óz kezeginde Tańatarov Arsen Internettegi videorolikterge senbeýge keńes berdi. "Bizdiń Qazaqstanda barlyǵy durys (din jaiynda - avtor.), - deidi Tańatarov. Meniń aitqan sózderimdi bireýler estip, túsinip otyrǵan shyǵar. Men endi jastarymyzdyń osylai emotsiialarǵa berilmeýin suraimyn. Sosyn saǵan aitylǵan dúnielerdi tekserip alýǵa keńes beremin. Sebebi basqa bireýler bizdiń emotsiiaǵa tez beriletinimizdi qoldanýy múmkin. Saldarynan sen jalǵyz qalasyń, jaqyńdaryndy, týystaryńdy joǵaltasyń".
Eske salaiyq, 2016 jyldyń 5 maýsymynda Aqtóbede bolǵan terakt kezinde jeti adam qaza bolǵan edi. Olardyń úsheýi áskeriler, tórteýi - beibit turǵyndar. Jaraqat alǵandar sany 30 shaqty. Terrorister qaladaǵy ákimshilik ǵimarattar men túrmeni basyp almaq bolǵan edi.
Dástúrli emes din aǵymynyń 25 ókili "Pantera" jáne "Pallada" qarý dúkenderine, 6655 áskeri bólimine shabýyl jasaǵan. Ol kezde Qazaqstanda alǵash ret terroristik qaýiptiń qyzyl deńgeii jariialanǵan bolatyn.
