Jeke kásipkerler úshin «E-Salyq Business» qosymshasy ázirlenip jatyr. Bul týraly búgin Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Úkimettiń keńeitilgen otyrysynda Prezident salyqtyq ákimshilendirýdi túbegeili ońailatý men jeńildetý boiynsha mindetter qoidy. Bul baǵytta eń aldymen jeke tulǵalardyń múlki men jerine salynatyn salyqtar biriktirilip, biryńǵai tólemmen tólenetin bolady. Kóp páterli turǵyn úilerdiń menshik ieleri úshin jer salyǵy bolmaidy», - dedi ol.
Ministrdiń aitýynsha, halyqqa arnalǵan salyq tóleýdiń yńǵaily «E-Salyq Azamat» mobildi qosymshasy ázirlendi. Qosymsha onlain salyq tóleýge, artyq tólemdi boldyrmaýǵa jáne taǵy basqa da jeńildikterge múmkindik beredi.
«Jeke kásipkerler úshin «E-Salyq Business» qosymshasy ázirlenýde. Jeke kásipkerlerdi tirkeý men jabýdy, salyq eseptiligin usynýdy ońailatý, sondai-aq komissiiany jáne fiskaldyq derekter operatorlarynyń qyzmetterine aqy tóleýdi alyp tastaý qarastyrylýda. Osy qosymshalar salyq tóleýshi rastai alatyn nemese túzete alatyn eseptilikti avtomatty túrde qalyptastyrady», - dedi Erulan Jamaýbaev.
