16 mamyrda Qyrǵyzstan Prezidenti Sooronbai Jeenbekov "Qyrǵyzstan Prezidentiniń qyzmetine kepildik berý týraly" zańǵa ózgerister engizý týraly zańǵa qol qoidy. Bul týraly Qyrǵyzstan Prezidentiniń apparaty habarlady.
Qyrǵyzstan Parlamenti bul zańdy biyl 4 sáýirde qabyldaǵan.
Byltyr jeltoqsanda qujat avtorlary - Kýrmankýl Zýlýshev pen Ishak Masaliev "Qyrǵyzstan Prezidentiniń qyzmetine kepildik berý týraly" zańdaǵy eks-prezidenttiń tiispeýshilik mártebesi týraly jazylǵan normany alyp tastaýdy usynǵan.
Biraq ekinshi oqylym kezinde Parlament bul normany alyp tastamai, tek jaýapqa tartý mehanizmderin jetildirý týraly sheshim qabyldaǵan. Prezident zań jobasyna qol qoisa, jogorký keńesh taǵyp, bas prokýror rastaǵan asa aýyr qylmys jasady degen aiyptan soń eks-prezident óz statýysynan aiyrylyp, jaýapqa tartylýy múmkin.
Sondai-aq, zań jobasynyń 11-babyna sáikes, eks-prezident memlekettik bilik organdarynda saiasi, arnaýly memlekettik laýazymdardy atqarmaýy tiis, saiasi partiialarda basshylyq qyzmette istep ne onyń qyzmetine aralaspaýǵa mindetti. Eks-prezident osy erejelerdi buzsa, bas prokýrordyń usynýymen, Prezident aktisimen oǵan berilgen kepildikterdiń kúshi joiylyp, burynǵy Prezidentti respýblikalyq biýdjet qarajaty esebinen materialdyq ne basqa da jaǵdailarmen qamtamasyz etý toqtatylady.
Zańǵa ózgeris engizý týraly talqy Almazbek Atambaevtyń Bishkek TETs-in modernizatsiialaýǵa tikelei qatysy bary týraly málimdemeden keiin kúsheigen. Qyrǵyzstan quqyq qorǵaý organdar "TETs-ti modernizatsiialaý kezinde sybailas jemqorlyq qylmysy bolǵan" dep kúdiktenedi. Atambaev aiypty joqqa shyǵarady.
Qyrǵyzstanda Roza Otýnbaeva jáne Almazbek Atambaevtyń eks-prezident degen mártebesi bar. Alǵashqy eki Prezident Asqar Aqaev pen Qurmanbek Bakiev halyq tolqýlary nátijesinde bilikten ketip, eks-prezident mártebesin ala almaǵan.
