Qyrǵyzstan prezidenti Sooronbai Jeenbekov Bishkekte tótenshe jaǵdai jariialaý týraly ekinshi ret jarlyqqa qol qoidy.
Prezidenttiń baspasóz qyzmetiniń habarlaýynsha, Jogorký Keńesh sońǵy úsh kúnde qalada TJ engizý týraly sheshimdi qarastyrmaǵandyqtan qaitadan jarlyqqa qol qoiylyp otyr.
Jarlyqqa sáikes, qalada 12 qazan keshki saǵat 20.00-den bastap 19 qazan tańerteńgi saǵat 7-ge deiin TJ rejimi engiziledi. Qujatta "jappai tártipsizdik saldarynan adamdardyń ómiri men densaýlyǵyna qaýip tóngendikten" TJ rejimi engizilip otyr dep jazylǵan.
Qala komendanty bolyp ishki ister ministriniń orynbasary Almazbek Orozaliev taǵaiyndalǵan. Osyǵan deiin prezidentpen kezdesý kezinde Orozalievtiń TJ rejimin uzartý týraly usynys aitqany habarlanǵan edi.
Prezident alǵash ret 9 qazanda Bishkekte tótenshe jaǵdai jariialaǵan. Qyrǵyzstanda 4 qazanda ótken parlament sailaýynan keiin saiasi kúshter Bishkektegi "Ala-Too" alańynda narazylyq aktsiiasyn bastaǵan. Parlament sailaýynyń nátijesin joiýdy talap etken narazylyq aktsiialarynyń sońy tártipsizdikke ulasqan. 6 qazanǵa qaraǵan túni demonstranttar parlament pen prezident apparaty ornalasqan "Aq úidi" basyp aldy.
Sol kúni narazylar talabynan keiin túrmedegi birneshe saiasatker qamaýdan shyqty. Olardyń arasynda burynǵy prezident Almazbek Atambaev, burynǵy depýtat Sadyr Japarov ta boldy. 10 qazanda Japarov premer-ministr qyzmetine bekitilgen. Keibir depýtattar onyń qyzmetke taǵaiyndalýynyń legitimdigine kúmán keltirgen.
Qyrǵyzstanda saiasi kúshter daǵdarystan shyǵý joldaryn áli talqylap jatyr. 9 qazanǵa qaraǵan túni Sooronbai Jeenbekov "memleket quqyqtyq aiaǵa oralǵan soń prezident qyzmetinen ketýge daiarmyn" dep málimdegen.
