Foto: Egemen.kz
Almatydaǵy Dostyq úiinde Qazaqstan Jazýshylar odaǵynyń uiymdastyrýymen jańa Konstitýtsiia jobasyna arnalǵan mazmundy jiyn ótti. Basqosýǵa shyǵarmashylyq ziialy qaýym ókilderi, qoǵam qairatkerleri, Májilis depýtattary men Konstitýtsiialyq reforma jónindegi komissiia músheleri qatysyp, el damýy úshin airyqsha mańyzy bar qujat tóńireginde oi bólisti, dep jazady Ult.kz Egemen.kz-ke silteme jasap.
Jiynǵa Qazaqstan Jazýshylar odaǵy Basqarmasynyń tóraǵasy Mereke Qulkenov tóraǵalyq etti. Kezdesýde jańa Konstitýtsiia jobasynyń tujyrymdamalyq negizderi, onyń qoǵamdyq jáne rýhani máni keńinen sóz boldy. Talqylaýǵa Janarbek Áshimjan, Aidos Sarym jáne Anar Fazyljan qatysyp, qujattyń mazmunyna qatysty usynystaryn ortaǵa saldy.
Basqosýdyń negizgi maqsaty el taǵdyryn aiqyndaityn mańyzdy quqyqtyq qujatqa shyǵarmashylyq qaýymnyń kózqarasyn júieleý, sondai-aq jańa Konstitýtsiia jobasyn jalpyulttyq talqylaýǵa keńinen tartý boldy. Osy turǵyda qalamgerler men ziialy qaýym ókilderi qoǵamdaǵy ózgeristerge sergek qarap, quqyqtyq reformalarǵa óz únin qosýdyń mańyzyn atap ótti.
Talqylaý barysynda konstitýtsiialyq reformanyń basym baǵyttary, jańa jobada qoǵam, mádeniet pen shyǵarmashylyq salasyna qatysty qarastyrylǵan normalar, azamattyq institýttardyń orny men jaýapkershiligi jan-jaqty taldandy. Qatysýshylar azamattardyń quqyqtary men bostandyqtaryn keńeitý, sóz jáne shyǵarmashylyq erkindigin institýtsionaldyq deńgeide kúsheitý eldiń uzaq merzimdi damýy úshin sheshýshi faktor ekenin aitty.
Sonymen qatar, shyǵarmashylyq qaýym ókilderi jańa Konstitýtsiiany tek quqyqtyq normalar jiyntyǵy retinde emes, qoǵamdyq sanany jańǵyrtatyn, ádilettilik pen jaýapkershilik qaǵidattaryn ornyqtyratyn rýhani tirek retinde qabyldaý qajettigin atap ótti. Bul ustanym qujattyń ómirsheńdigi men qoǵamdaǵy qabyldaný deńgeiin arttyrýǵa yqpal etetini aityldy.
