Qazaqstan tarihi dástúrlerge qurmet pen dini senim bostandyǵynyń zamanaýi qaǵidattaryn ushtastyra otyryp, konfessiiaaralyq dialogty júieli túrde damytyp keledi. Elde túrli dini konfessiialar arasyndaǵy ózara is-qimyl baǵytynda jinaqtalǵan tájiribe halyqaralyq qaýymdastyqtyń qyzyǵýshylyǵyn týdyryp, halyqtar arasyndaǵy senimdi nyǵaitýǵa yqpal ete alady. Mundai pikirdi japoniialyq jýrnalist, Inter Press Service agenttiginiń Aziia-Tynyq muhity biýrosynyń direktory Katsýhiro Asagiri bildirdi.
Ol Astanaǵa sapary kezinde Qazaqstannyń dini eskertkishterimen, sáýletimen jáne mádeni murasymen tanysyp, óz baiqaýlarymen bólisti. Jýrnalistiń baǵalaýynsha, eldiń ereksheligi – ǵasyrlar boiy qalyptasqan rýhani dástúrler men qoǵamdy damytýdyń zamanaýi tásilderiniń úilesiminde.
«Qazaqstan – bai tarihi mura, dini áralýandyq pen zamanaýi umtylystar bir-birin úilesimdi tolyqtyratyn memleketterdiń biregei úlgisi», – dedi Katsýhiro Asagiri.
«Meni ásirese islam sáýletiniń dástúrleri qazaqtyń ulttyq mádenietiniń elementterimen qanshalyqty tabiǵi úilesetini qyzyqtyrdy», – dep atap ótti ol.
Jýrnalist ar-ojdan bostandyǵynyń quqyqtyq kepildikterine, ózara qurmetke jáne ár adamnyń dini senimi men dástúrin saqtaý múmkindigine de nazar aýdardy. Onyń aitýynsha, Qazaqstan – dinniń memleketten bólinýi, ar-ojdan bostandyǵy jáne dini nanymyna qarai kemsitýge jol bermeý qaǵidattary Konstitýtsiia deńgeiinde bekitilgen zaiyrly memleket.
Asagiridiń pikirinshe, quqyqtyq kepildikter men ózara qurmet mádenietiniń úilesýi túrli konfessiia ókilderiniń beibit qatar ómir súrýine jaǵdai jasaidy.
Japoniialyq jýrnalist Qazaqstannyń konfessiiaaralyq dialogty damytýdaǵy halyqaralyq róline de toqtaldy. Onyń paiymdaýynsha, jasandy intellektiniń damýy, klimattyń ózgerýi jáne adam qadir-qasietin qorǵaý sekildi jahandyq syn-qaterler jaǵdaiynda dini qaýymdastyqtar arasyndaǵy ózara is-qimyldyń mańyzy artyp keledi.
«Meniń oiymsha, Qazaqstan konfessiiaaralyq dialogty halyqaralyq yntymaqtastyqtyń pármendi quralyna ainaldyrýǵa júieli túrde umtylyp keledi», – dedi jýrnalist.
Asagiridiń pikirinshe, túrli mádenietterge ashyq bolý, ózge adamdardyń senimine qurmetpen qaraý jáne ortaq sheshim izdeýge daiyndyq jekelegen memleketter ishinde ǵana emes, halyqaralyq deńgeide de ózara túsinistikti nyǵaita alady.
«Qazaqstannyń tájiribesi mádeni aiyrmashylyqtarǵa qurmetpen qaraý men dialogqa ashyq bolý neǵurlym beibit ári turaqty bolashaq qurýdyń mańyzdy negizine ainala alatynyn kórsetedi», – dep túiindedi sarapshy.
