Telefonǵa telmirip, jahandyq jelide jastyǵyn ótkizip jatqan balalardy qalai kitapqumar jastarǵa ainaldyra alamyz? Balalar ádebietiniń oqyrmany kún ótken saiyn azaiyp barady. Iá, «taiaqtyń eki ushy bar» sekildi, munda oqyrmannyń ǵana emes, qalamgerdiń de kemshiligi bolýy múmkin. Nege deseńiz, búgingi kúni bala sanasyna sai keletin balalar shyǵarmalaryna suranys kóp bolǵanymen, olar jetkiliksiz. Osy máseleni otandyq arnalardyń birinde talqylaǵan jiyn ótti, - dep habarlaidy «Ult aqparat».
Rasynda búginde balalar ádebieti kenjelep qaldy. Ǵalamtordan jyldam aqparat alyp úirengen bala kitap oqýǵa onsha qulyq tanytpaidy. Onyń ústine arnaiy balaǵa arnap jazylatyn qazaqsha kitaptar da azaiǵan. Balalarǵa arnalǵan sórelerden buryn jazylǵan shyǵarmalardy ǵana kezdestirýge bolady. Onyń ózi sirep bara jatqanǵa uqsaidy. Bul týraly kitaphanashylar qashannan dabyl qaǵyp júrgeni belgili. Jalpy qazaq tilindegi kitaptyń úlesi artty degenimizben, balalar ádebietiniń basym bóligin aýdarmalar quraidy.
«Iá, rasynda kitaphanamyzda aýdarma kitaptarymyz óte kóp. Balalar oqityn kitap joq deýge bolmaidy. Bar, biraq onyń ózi aýdarma bolyp tur. Qazirgi jazýshylardyń shyǵyp jatqan shyǵarmalary az, balalarǵa arnalǵan týyndy taptyra bermeidi. sáikesinshe suranys ta azaiady. Búgingi tańda óskeleń urpaqty kitappen tárbielegimiz kelse, balalar ádebietine janashyrlyqpen qaraǵanymyz abzal. Biz kitaphanashylar balalarǵa arnalǵan túrli sharalardy uiymdastyryp turamyz. Olardyń oqýǵa, kitapqa degen qyzyǵýshylyǵyn arttyrý úshin. Qyzyǵýshylyq bolǵanymen, suranysty qanaǵattandyra almasaq, ol da úlken másele», - deidi kitaphanashy Janna Baidarbekova.
Al jazýshy Qarjaýbai Sartqojauly balany kitap álemine jeteleitindei shyǵarmalar azaiyp ketti deidi. Kezinde jasóspirim balalarǵa arnap kórkem proza jazǵan jazýshy búginde ádebi kitap tappaitynyn aitady.
«Aqyndar jaqsy jazyp júr. Al jazýshylardyki sirek. Nege? Birinshiden, memleket tarapynan yntalandyrý joq. Balalar ádebietiniń bir baspa tabaǵy pálenbai myń, jazýshylardy nasihattaý kerek. Balalar ádebieti jyly dep, oǵan bir jyl ǵana arnaǵanymyz jón emes. Balalar ádebieti urpaq tárbiesi. Ol ómir boiy ózekti bolýy kerek. sondyqtanda balalarǵa arnap jazatyn aqyndardyń da, jazýshylardyń da jaǵdaiyn jasaýymyz kerek. jaǵdai degende, olarǵa eshkim materialdyq jaǵdai jasap bersin demeidi. Tek týyndylaryn jaryqqa shyǵaryp, el arasynda taralýyna atsalysqanymyz durys. Sonda ǵana balalar ádebietiniń kóshi ilgeri basary sózsiz», - deidi jazýshy Qarjaýbai Sartqojauly.
Rasynda adam balasynyń ómirge degen kózqarasy men talǵamy balalar ádebietinen qalyptasady. Balalar ádebieti urpaq tárbiesiniń tal besigi. Taǵlym, tárbiesi. Sondyqtan bul sala eshqashanda qamqorlyqtan, nazardan tys qalmaýy kerek. Al jazýshy Baianǵali Álimjan da dál osy máseleni kóterip, dabyl qaqty.
«Balalar ádebietiniń deńgeii qandai, baǵyty qandai deitin bolsaq... ejelden qazaq balasy meiirban halyq, izgilikti ańsaǵan halyq, balalardy adamgershilikke tárbielegen halyq. Sol tamyrdan qol úzip ketken joqpyz. Qazirgi aqyn-jazýshylarymyzdyń da jazatyny sol, balany izgilikke, adamgershilikke, jaqsylyqqa baýlý. Al kitaptyń jetý, shyǵý jaǵdaiyna kelsek, munda másele kóp. Sóreden burynǵy jazýshylardyń kitabynyń ózin sirek tabamyz. Olar tozdy ǵoi. Kitap ta qaǵaz ǵoi, tozady. Joǵalady, jyrtylady. Ony qaitadan shyǵaryp otyrmasa. Qaitadan jańǵyrtyp, balalarǵa berip otyrmasa ol árine azaiady. Ekinshiden, búgingi balalar jazýshylarynyń jaǵdaiyna keletin bolsaq, «káne, balalarǵa arnalǵan shyǵarmalaryń bar ma?», «osyny shyǵara qoiaiyq», «osyny tarataiyq» dep jatqan baspalardy biz sirek kóremiz. Sondyqtan kóbine aýdarmaǵa ketip jatyrmyz. Taǵy bir úlken másele, baspadan balalar kitaby shyqqan kúnniń ózinde oqyrmanǵa jetýi óte qiyn», - deidi jazýshy Baianǵali Álimjan.
Osylaisha, jinalǵan ziialy qaýym balalar ádebietiniń negizgi máselelerin talqylai kele birneshe usynys aitty. Onyń ishinde eń ózektisi: balalar ádebietiniń shyǵarmalaryn salyqtan bosatsa deidi. Óitkeni bul óte mańyzdy másele. Bul urpaq tárbiesine qatysty dúnie.
