تەلەفونعا تەلمٸرٸپ, جاھاندىق جەلٸدە جاستىعىن ٶتكٸزٸپ جاتقان بالالاردى قالاي كٸتاپقۇمار جاستارعا اينالدىرا الامىز? بالالار ەدەبيەتٸنٸڭ وقىرمانى كٷن ٶتكەن سايىن ازايىپ بارادى. يە, «تاياقتىڭ ەكٸ ۇشى بار» سەكٸلدٸ, مۇندا وقىرماننىڭ عانا ەمەس, قالامگەردٸڭ دە كەمشٸلٸگٸ بولۋى مٷمكٸن. نەگە دەسەڭٸز, بٷگٸنگٸ كٷنٸ بالا ساناسىنا ساي كەلەتٸن بالالار شىعارمالارىنا سۇرانىس كٶپ بولعانىمەن, ولار جەتكٸلٸكسٸز. وسى مەسەلەنٸ وتاندىق ارنالاردىڭ بٸرٸندە تالقىلاعان جيىن ٶتتٸ, - دەپ حابارلايدى «ۇلت اقپارات».
راسىندا بٷگٸندە بالالار ەدەبيەتٸ كەنجەلەپ قالدى. عالامتوردان جىلدام اقپارات الىپ ٷيرەنگەن بالا كٸتاپ وقۋعا ونشا قۇلىق تانىتپايدى. ونىڭ ٷستٸنە ارنايى بالاعا ارناپ جازىلاتىن قازاقشا كٸتاپتار دا ازايعان. بالالارعا ارنالعان سٶرەلەردەن بۇرىن جازىلعان شىعارمالاردى عانا كەزدەستٸرۋگە بولادى. ونىڭ ٶزٸ سيرەپ بارا جاتقانعا ۇقسايدى. بۇل تۋرالى كٸتاپحاناشىلار قاشاننان دابىل قاعىپ جٷرگەنٸ بەلگٸلٸ. جالپى قازاق تٸلٸندەگٸ كٸتاپتىڭ ٷلەسٸ ارتتى دەگەنٸمٸزبەن, بالالار ەدەبيەتٸنٸڭ باسىم بٶلٸگٸن اۋدارمالار قۇرايدى.
«يە, راسىندا كٸتاپحانامىزدا اۋدارما كٸتاپتارىمىز ٶتە كٶپ. بالالار وقيتىن كٸتاپ جوق دەۋگە بولمايدى. بار, بٸراق ونىڭ ٶزٸ اۋدارما بولىپ تۇر. قازٸرگٸ جازۋشىلاردىڭ شىعىپ جاتقان شىعارمالارى از, بالالارعا ارنالعان تۋىندى تاپتىرا بەرمەيدٸ. سەيكەسٸنشە سۇرانىس تا ازايادى. بٷگٸنگٸ تاڭدا ٶسكەلەڭ ۇرپاقتى كٸتاپپەن تەربيەلەگٸمٸز كەلسە, بالالار ەدەبيەتٸنە جاناشىرلىقپەن قاراعانىمىز ابزال. بٸز كٸتاپحاناشىلار بالالارعا ارنالعان تٷرلٸ شارالاردى ۇيىمداستىرىپ تۇرامىز. ولاردىڭ وقۋعا, كٸتاپقا دەگەن قىزىعۋشىلىعىن ارتتىرۋ ٷشٸن. قىزىعۋشىلىق بولعانىمەن, سۇرانىستى قاناعاتتاندىرا الماساق, ول دا ٷلكەن مەسەلە», - دەيدٸ كٸتاپحاناشى جاننا بايداربەكوۆا.
ال جازۋشى قارجاۋباي سارتقوجاۇلى بالانى كٸتاپ ەلەمٸنە جەتەلەيتٸندەي شىعارمالار ازايىپ كەتتٸ دەيدٸ. كەزٸندە جاسٶسپٸرٸم بالالارعا ارناپ كٶركەم پروزا جازعان جازۋشى بٷگٸندە ەدەبي كٸتاپ تاپپايتىنىن ايتادى.
«اقىندار جاقسى جازىپ جٷر. ال جازۋشىلاردىكٸ سيرەك. نەگە? بٸرٸنشٸدەن, مەملەكەت تاراپىنان ىنتالاندىرۋ جوق. بالالار ەدەبيەتٸنٸڭ بٸر باسپا تاباعى پەلەنباي مىڭ, جازۋشىلاردى ناسيحاتتاۋ كەرەك. بالالار ەدەبيەتٸ جىلى دەپ, وعان بٸر جىل عانا ارناعانىمىز جٶن ەمەس. بالالار ەدەبيەتٸ ۇرپاق تەربيەسٸ. ول ٶمٸر بويى ٶزەكتٸ بولۋى كەرەك. سوندىقتاندا بالالارعا ارناپ جازاتىن اقىنداردىڭ دا, جازۋشىلاردىڭ دا جاعدايىن جاساۋىمىز كەرەك. جاعداي دەگەندە, ولارعا ەشكٸم ماتەريالدىق جاعداي جاساپ بەرسٸن دەمەيدٸ. تەك تۋىندىلارىن جارىققا شىعارىپ, ەل اراسىندا تارالۋىنا اتسالىسقانىمىز دۇرىس. سوندا عانا بالالار ەدەبيەتٸنٸڭ كٶشٸ ٸلگەرٸ باسارى سٶزسٸز», - دەيدٸ جازۋشى قارجاۋباي سارتقوجاۇلى.
راسىندا ادام بالاسىنىڭ ٶمٸرگە دەگەن كٶزقاراسى مەن تالعامى بالالار ەدەبيەتٸنەن قالىپتاسادى. بالالار ەدەبيەتٸ ۇرپاق تەربيەسٸنٸڭ تال بەسٸگٸ. تاعلىم, تەربيەسٸ. سوندىقتان بۇل سالا ەشقاشاندا قامقورلىقتان, نازاردان تىس قالماۋى كەرەك. ال جازۋشى بايانعالي ەلٸمجان دا دەل وسى مەسەلەنٸ كٶتەرٸپ, دابىل قاقتى.
«بالالار ەدەبيەتٸنٸڭ دەڭگەيٸ قانداي, باعىتى قانداي دەيتٸن بولساق... ەجەلدەن قازاق بالاسى مەيٸربان حالىق, ٸزگٸلٸكتٸ اڭساعان حالىق, بالالاردى ادامگەرشٸلٸككە تەربيەلەگەن حالىق. سول تامىردان قول ٷزٸپ كەتكەن جوقپىز. قازٸرگٸ اقىن-جازۋشىلارىمىزدىڭ دا جازاتىنى سول, بالانى ٸزگٸلٸككە, ادامگەرشٸلٸككە, جاقسىلىققا باۋلۋ. ال كٸتاپتىڭ جەتۋ, شىعۋ جاعدايىنا كەلسەك, مۇندا مەسەلە كٶپ. سٶرەدەن بۇرىنعى جازۋشىلاردىڭ كٸتابىنىڭ ٶزٸن سيرەك تابامىز. ولار توزدى عوي. كٸتاپ تا قاعاز عوي, توزادى. جوعالادى, جىرتىلادى. ونى قايتادان شىعارىپ وتىرماسا. قايتادان جاڭعىرتىپ, بالالارعا بەرٸپ وتىرماسا ول ەرينە ازايادى. ەكٸنشٸدەن, بٷگٸنگٸ بالالار جازۋشىلارىنىڭ جاعدايىنا كەلەتٸن بولساق, «كەنە, بالالارعا ارنالعان شىعارمالارىڭ بار ما?», «وسىنى شىعارا قويايىق», «وسىنى تاراتايىق» دەپ جاتقان باسپالاردى بٸز سيرەك كٶرەمٸز. سوندىقتان كٶبٸنە اۋدارماعا كەتٸپ جاتىرمىز. تاعى بٸر ٷلكەن مەسەلە, باسپادان بالالار كٸتابى شىققان كٷننٸڭ ٶزٸندە وقىرمانعا جەتۋٸ ٶتە قيىن», - دەيدٸ جازۋشى بايانعالي ەلٸمجان.
وسىلايشا, جينالعان زييالى قاۋىم بالالار ەدەبيەتٸنٸڭ نەگٸزگٸ مەسەلەلەرٸن تالقىلاي كەلە بٸرنەشە ۇسىنىس ايتتى. ونىڭ ٸشٸندە ەڭ ٶزەكتٸسٸ: بالالار ەدەبيەتٸنٸڭ شىعارمالارىن سالىقتان بوساتسا دەيدٸ. ٶيتكەنٸ بۇل ٶتە ماڭىزدى مەسەلە. بۇل ۇرپاق تەربيەسٸنە قاتىستى دٷنيە.
