قاراعاندىدا پوليتسەيلەر №29 باعىتتاعى اۆتوبۋستىڭ جٷرگٸزۋشٸسٸن جولاۋشىلار تاسىمالداۋ باعىتىنان شەتتەتتٸ. ول اۆتوبۋستى الكوگولدٸك ماس كٷيدە باسقارعان. مەديتسينالىق كۋەلاندىرۋ نەتيجەسٸندە جٷرگٸزۋشٸنٸڭ قانىنداعى الكوگول مٶلشەرٸ 1,95 پروميللە بولعانى انىقتالدى, دەپ حابارلايدى ult.kz.
پاترۋلدٸك پوليتسييا قىزمەتكەرلەرٸنٸڭ نازارىنا اۆتوبۋس جٷرگٸزۋشٸسٸ نازارباەۆ داڭعىلىنداعى جاياۋ جٷرگٸنشٸلەر ٶتكەلٸندە ادامعا جول بەرمەگەننەن كەيٸن ٸلٸككەن. پوليتسەيلەر ونىڭ سوڭىنان ەرگەن.
كەلەسٸ ايالدامادا پوليتسييا قىزمەتكەرلەرٸ جٷرگٸزۋشٸگە جاقىنداماق بولعان. الايدا ولار جەتٸپ ٷلگەرمەي جاتىپ, اۆتوبۋس ٸشٸندەگٸ جولاۋشىلارىمەن قايتا قوزعالعان.
كٶپ ۇزاماي اۆتوبۋس توقتاتىلدى. جٷرگٸزۋشٸ باعىتتان شەتتەتٸلٸپ, مەديتسينالىق كۋەلاندىرۋعا جەتكٸزٸلدٸ. تەكسەرۋ ونىڭ 1,95 پروميللە الكوگولدٸك ماس كٷيدە بولعانىن كٶرسەتتٸ.
ٸس ماتەريالدارى سوتقا جولداندى. جٷرگٸزۋشٸگە ەكٸمشٸلٸك قاماۋعا الۋ جەنە كٶلٸك قۇرالىن باسقارۋ قۇقىعىنان جەتٸ جىلعا ايىرۋ جازاسى قولدانىلۋى مٷمكٸن.
