Foto: qazaqadebieti.kz
Alash zertteýshisi-ǵalym, jazýshy Eldos Toqtarbai Qazaqstan Jazýshylar odaǵy janyndaǵy Balalar men jasóspirimder ádebieti janrlyq keńesiniń tóraǵasy qyzmetinen alynǵanyn habarlady. Onyń aitýynsha, bul sheshim Konstitýtsiiadaǵy orys tilin alyp tastaý týraly jazbalary úshin qabyldanǵan, dep habarlaidy Ult.kz.
Eldos Toqtarbaidyń málimdeýinshe, keńes tóraǵasy qyzmetinen bosatý týraly sheshimdi QJO tóraǵasy Mereke Qulkenov qabyldaǵan. Sondai-aq keńestegi taǵy eki áriptesine de «ornyn bosatsyn» degen talap qoiylǵan.
«Eki aptadai elden jyraq, saparda júrgenimde, meni QJO Tóraǵasy Mereke aǵa Qulkenov Balalar men jasóspirimder ádebieti janrlyq keńesiniń tóraǵasy qyzmetinen TIL týraly jazǵan jazbalarym úshin alyp tastapty. Keńestegi eki áriptesime «Ornyn bosatsyn!» dep ámir beripti», — dedi ol.
Ol atalǵan qyzmettiń qoǵamdyq negizde, aqysyz atqarylǵanyn atap ótti. Aitýynsha, bul laýazymdy jeke mansap úshin emes, ulttyq balalar ádebietiniń damýyna úles qosý maqsatynda qabyldaǵan.
Eldos Toqtarbai bes aidyń ishinde keńes aiasynda birqatar joba júzege asqanyn málimdedi. Onyń sózinshe, umyt qalǵan balalar jazýshylary túgendelip, «Balalar ádebietiniń baǵbandary», «Balalar kitaphanasy», «Jasóspirimder kitaphanasy» seriialary aiasynda 9 kitap jaryq kórgen. Qazirgi tańda taǵy 7 kitaptyń baspaǵa daiyndalyp jatqanyn aitty.
Sonymen qatar Qazaqstan boiynsha balalar taqyrybyna qalam tartatyn 117 jazýshynyń basy qosylyp, ortaq ádebi baza men oqyrman klýby qurylǵan. Eldos Toqtarbai aldaǵy ýaqytta ata-analar men balalarǵa arnalǵan táýlik boiy tegin qyzmet kórsetetin salalyq ádebi saitty iske qosýdy josparlaǵanyn da jetkizdi.
Ol ózine qatysty «Odaq tóraǵalyǵyna umtylyp júr» degen alypqashpa áńgimelerdiń taraǵanyn, alaida oǵan mán bermei, jumysty jalǵastyra bergenin atap ótti.
«Tiliniń múddesi taptalǵan jerde taq úshin jantalasyp, ólermendik tanytý — súiegine Alash rýhy sińgen azamatqa jarasar qylyq emes! Qaiyrlysy!», — dep jazdy ol.
Málimdeme sońynda Eldos Toqtarbai óńirlerdegi balalar jazýshylary men áriptesterinen keshirim surady.
