Qazaq ádebieti aýyr qazaǵa ushyrady. Belgili jazýshy, aýdarmashy Keńes Iýsýp 76 jasyqa qaraǵan shaǵynda dúnieden ótti.
Keńes Iýsýp 1941 jyly 30 maýsymda Shyǵys Qazaqstan oblysynyń Tavriia aýdanyndaǵy Baimur aýylynda dúniege kelgen. Óskemen qalasyndaǵy Jambyl atyndaǵy qazaq orta mektebin 1958 jyly bitirgennen keiin, Semeidegi ózenshiler ýchilishesin tamamdap, Joǵarǵy Ertis keme sharýashylyǵynda eńbek etedi. Qazaq memlekettik ýniversitetiniń jýrnalistika fakýltetin bitirgen. Shyǵys Qazaqstan oblystyq «Kommýnizm týy» gazetinde ádebi qyzmetker, bólim meńgerýshisi, «Sotsialistik Qazaqstan» gazetinde ádebi qyzmetker, bólim meńgerýshisi, jaýapty hatshy, «Qazaqstan kommýnisi» jýrnalynyń bólim meńgerýshisi, «Juldyz» jýrnalynyń bólim meńgerýshisi bolyp isteidi. Memlekettik basqarý organdarynda jaýapty qyzmetter atqardy. Qazaqstan Respýblikasynyń Prezidenti Baspasóz qyzmetiniń bas sarapshysy bolǵan.
«Jalyn» baspasynan «Aqiqat sapar» (1977), «Qarashadaǵy kóktem» (1981), «Ohapka polevyh tsvetov» (1983) povesteri men áńgimeleriniń jinaqtary, «Jelqaiyq» kitaby («Elorda», 2000) shyqty. Sonymen qatar onyń terminologiia, qazaq tilinde is júrgizý máselelerine arnalǵan «Qujat tili» kitaby 2001 jyly Pavlodar oblystyq «Altyn til» baǵdarlamasynyń aiasynda jaryq kórip, «Jalyn» baspasy uiymdastyrǵan jabyq báigeniń ekinshi júldesin aldy. Sondai-aq «Qazaqstan» jáne «Atamura» baspalarynan «Anyqtama sózdigi» (1992), «Eki tilde is júrgizý» (1994) kitaptary jaryq kórdi.
G.G.Markestiń «Júz jyldyq jalǵyzdyq» romanyn (1983), jas bolgar jazýshylarynyń povesteri men áńgimeleriniń jinaǵyn («Gúljazira», 1987) aýdaryp bastyrdy.
«Qazaqstannyń eńbek sińirgen qairatkeri» qurmetti ataǵynyń iegeri (2000).
Ult portaly ujymy marqumnyń aǵaiyn-týystaryna qaiǵyra kóńil aitady.
