Foto: Tengrinews.kz
Jazǵy demalys maýsymy jaqyndaǵan saiyn týrister tabiǵatty, mádenietti, jaily infraqurylymdy biriktiretin baǵyttardy izdei bastaidy. Qazaqstanda jazǵy týrizmdi damytý úshin túrli múmkindik bar. QR Týrizm jáne sport ministrligi ekotýrizm jáne tanymdyq baǵyttar áleýetin ashatyn TOP-5 baǵytty usyndy, dep habarlaidy Ult.kz.
1. Katonqaraǵai, Shyǵys Qazaqstan oblysy
Katonqaraǵai ulttyq parki — Qazaqstanda Green Destinations halyqaralyq tizimine engen alǵashqy aýmaq. Óńir kórkem tabiǵatymen, biik taýlarymen, kólderimen, emdik bulaqtarymen tanymal. Týrister Iazevoe kóline, Belýha taýyna, «Rahman qainary» qoryq aimaǵyna jáne Shúkir Shaijúnisov mýzeiine barýyna bolady. Bul óńir ekotýrizm, alpinizm jáne saýyqtyrý týrizmi úshin óte qolaily oryn sanalady.
2. Qorǵaljyn qoryǵy, Aqmola oblysy
Qorǵaljyn — qoqiqazdardy tabiǵi mekeninde kórýge bolatyn álemdegi sirek oryndardyń biri. Jazda qoryq kólderine myńdaǵan jyl qusy ushyp keledi. Bul baǵyt ornitologiiamen ainalysatyndar men tabiǵat tynyshtyǵyn qalaityn týrister arasynda tanymal.
3. Altynemel ulttyq parki, Jetisý oblysy
Altynemel — tabiǵi alýantúrlilik pen mádeni mura toǵysqan iri týristik ortalyqtardyń biri. Parkte zamanaýi vizit-ortalyq jumys isteidi. Týristerge baǵyttar boiynsha aqparat berý, qyzmet kórsetý, navigatsiialyq qoldaý usynylady. Basty nysandardyń qatarynda — «Aiǵai qum», Aqtaý taýlary men Tamǵaly-Tas petroglifteri bar. Bul baǵyt otbasylyq jáne jeke saiahatqa da qolaily.
4. Sairam-Ógem ulttyq parki, Túrkistan oblysy
Sairam-Ógem — ońtústik aimaqtaǵy áleýeti joǵary, biraq áli tolyq ashylmaǵan baǵyttardyń biri. Munda muzdyq kólderge aparatyn jaiaý baǵyttar men taý florasymen tanysý múmkindigi bar. Ekotýrizm damyp kele jatqan bul óńir ishki týrizm úshin tyń múmkindikke ainalýda.
5. «Sartas» vizit-ortalyǵy, Mańǵystaý oblysy
Mańǵystaý óńiri týristik infraqurylymdy belsendi túrde damytyp keledi. Jańadan ashylǵan «Sartas» vizit-ortalyǵy óńirdiń petroglifterine, jartas keshenderine jáne qasietti oryndaryna baratyn kelýshiler úshin ashyq. Bul ortalyq logistika men qaýipsiz marshrýttarǵa qolaily jaǵdai jasaidy. Jaz mezgili — Mańǵystaýdyń erekshe tabiǵaty men tarihi keńistigin tanýǵa taptyrmas kezeń.
