Orsk — Orynbor
oblysyndaǵy 200 myńǵa jýyq halqy bar ekinshi úlken qalany Jaiyq ózeniniń sýy
basty. Resei biliginiń aitýynsha, sý deńgeii buryn-sońdy bolmaǵan rekordtyq
deńgeige kóterildi. Bógetter sýdyń qysymyna tótep bere almai, jaryldy. Sý
basqan qalada sirenalar estilip, jappai evakýatsiia jalǵasýda, dep habarlaidy "BBC".
Reseidiń 39 aimaǵynda 6,8 myńnan astam turǵyn úi sý astynda qaldy, dep habarlady Resei TJM baspasóz qyzmeti.
"Sý tasqyny 39 óńirge keri áserin tigizýde. 6,8 myńnan astam turǵyn úi sý astynda qaldy", - delingen habarlamada.
Alaida Orynbor oblysyndaǵy jaǵdai asa kúrdeli.
Orynbordaǵy Jaiyq ózeniniń deńgeii jeksenbi kúni keshke qarai 930 santimetrge ósti, dep habarlady qala ákimdigi telegramda.
"Orynbor gidrometeorologiialyq ortalyǵynyń málimetinshe, 7 sáýir kúni keshke Orynbor mańyndaǵy Jaiyq ózenindegi sý deńgeii 864 sm-ge jetti, qaýipti deńgei – 930 sm", - dep eskertedi qala ákimdigi.
Qazir Orynbor oblysynda júrgen Resei Federatsiiasynyń TJM basshysy Aleksandr Kýrenkov Orskidegi jaǵdaidy «daǵdarysty» dep atady.
"Jaiyq ózenindegi qorǵanys qurylystary qiraǵan Orsk qalasynda kúrdeli jaǵdai qalyptasty. Nátijesinde 4 518 turǵyn úi men 4 587 úi ýchaskeleri sý astynda qaldy", - deidi Interfaks.
Jeksenbi kúni keshke qala meri Vasilii Kozýpitsa telegramda Orskide Elshanka ózeni óz arnasynan tasyp jatqanyn habarlady. Ministrdiń málimetinshe, óńirde sý basqan aýdandardan 4 myńnan astam adam, onyń ishinde 885 bala evakýatsiialanǵan. Sý tasqyny saldarynan jergilikti munai óńdeý zaýyty — "Orsknefteorgsintez" kásiporny jumysyn toqtatty.
Meditsinalyq kómekke 99 adam, onyń ishinde 18 bala júgindi, dep habarlaidy jergilikti bilik.
Qylmystyq is eki bap boiynsha qozǵaldy — qurylys jumystary kezinde qaýipsizdik erejelerin buzý jáne nemqurailylyq.
10 jyldan astam ýaqyt buryn Orsktegi Jaiyqtyń eki jaǵalaýynda ózennen birshama qashyqtyqta úiindi bógetter salyndy. Mundai bógetter topyraq pen qiyrshyq tastan quiylady. Olar kóktemgi sý tasqyny kezinde sýdyń turǵyn úilerge jaqyndaýyna jol bermedi. Biyl sý tasqynynyń qarqyny myqty boldy. Sondyqtan joǵary aǵys boiynsha GES-te Iriklin sý qoimasynan sý aǵyzýdy ulǵaitýǵa týra keldi. Bógetter sýdyń rekordtyq qysymyna tótep bere almady. Juma kúni Jaiyqtyń sol jaǵalaýyndaǵy bóget jarylyp, eski qalany sý basý bastaldy.
Bir táýlik ishinde Orsktegi sý alǵan aýmaq birneshe esege keńeidi. Jeksenbi kúni tańerteń taǵy úsh kóshede evakýatsiia jariialandy, al sý basqan shaǵyn aýdandarda elektr qýaty men gaz óshirile bastady.
