Reseilik akter ári ázilkesh Mihail Galýstian Tájikstanǵa saparynan keiin «Nasha Russia» shoýyndaǵy rólderi úshin tájik halqynan keshirim surady. Onyń burynǵy ázilderi keibir kórermenderdiń kóńiline tigen bolsa, ókinetinin aitty, dep habarlaidy ult.kz NewTimes.kz-ke silteme jasap.
Galýstiannyń keshirim suraǵan videosyn Instagram jelisinde TAS International Group kompaniiasynyń basshysy Oleg Samsonov jariialaǵan.
Akter Dýshanbege alǵash ret kelgenin aityp, qalanyń sáýletine, kórkine, turǵyndarynyń qonaqjailyǵyna jáne damý qarqynyna tánti bolǵanyn jetkizdi. Sondai-aq sapardan keiin Tájikstannyń tarihy men mádenietin tereńirek tanyǵanyn atap ótti.
«Eger burynǵy jumystarym men somdaǵan rólderim bireýdiń kóńiline qaiaý túsirse nemese búgingi Tájikstanǵa saparyma bailanysty narazylyqqa sebep bolsa, shyn júrekten ókinemin jáne sizderden shyn kóńilimmen keshirim suraimyn. Búkil tájik halqynan keshirim ótinemin», – dedi akter.
Ol sapar kezinde kórsetilgen qurmet pen qonaqjailyq úshin Tájikstan turǵyndaryna alǵys aitty.
Galýstiannyń sapary nege synǵa ushyrady?
Avesta basylymynyń málimetinshe, qoǵamdaǵy talqylaýǵa akterdiń 30 qyrkúiekte Dýshanbede ótken jabyq is-sharaǵa qatysýy sebep bolǵan. Kezdesýdi TAS International Group kompaniiasy klientteri men seriktesteri úshin uiymdastyrǵan.
Alaida áleýmettik jeli qoldanýshylary akterdiń burynǵy rólderin jappai synǵa alǵan. Keibir qoldanýshylar onyń ázilderi Tájikstannan shetelge jumys isteýge baratyn migranttardy kemsitip kórsetedi dep synaǵan. Basqalary akterge óz ustanymyn túsindirýge múmkindik berý keregin aitqan.
Tájikstannyń Mádeniet ministrligi buǵan deiin Galýstiannyń elge kelýi vedomstvomen kelisilmegenin málimdegen.
«Nasha Russia» shoýyndaǵy Ravshan men Djamshýt kimder?
Mihail Galýstian tanylǵan «Nasha Russia» ázil-syqaq shoýy 2006–2011 jyldary TNT telearnasynda kórsetilgen.
Baǵdarlamada Mihail Galýstian Ravshannyń, al Valerii Magdiash Djamshýttyń rólin somdady. Eki keiipker Tájikstannan kelgen eńbek migranttary retinde beinelenip, kóbine bilimi tómen, qarapaiym nárselerdi túsinbeitin adamdar retinde kórsetilgen.
Bul obrazdar Tájikstan qoǵamynyń bir bóliginiń narazylyǵyn týdyrǵan. Synshylar mundai ázilder tájik migranttary týraly jaǵymsyz stereotipterdi qalyptastyrady dep eseptegen.
Shoý kórsetilgen kezeńde Tájikstan Syrtqy ister ministrligi Resei tarapyna resmi nota joldaǵan. Sonymen qatar elde osy ázil-syqaq jobasyna bailanysty film jazylǵan diskilerdiń taralýyna tyiym salynǵan.
Arada birneshe jyl ótse de, Ravshan men Djamshýttyń obrazdary qoǵamda pikirtalas týǵyzyp keledi. Galýstiannyń Dýshanbege sapary osy máseleni qaita kún tártibine shyǵardy.
