Foto:atr.kz
Qazirgi ýaqytta sý tasqynyna bailanysty eldegi ahýaldyń jai-japsaryn baiandaǵan QR Tótenshe Jaǵdailar Ministrligi ókili Asqar Shárip Jaiyqtyń sýy áli de kóterilip jatqanyn aityp otyr, -dep habarlaidy "Ult Aqparat".
"Azamattyq qorǵaý qyzmetterimen Atyraý, Aqtóbe, Batys Qazaqstan jáne Soltústik Qazaqstan oblystarynda sý tasqynyna qarsy is-sharalar, sý tasqyny saldaryn joiý jáne halyqqa kómek kórsetý boiynsha jumystar jalǵasýda.
Batys Qazaqstan oblysynda jaǵdai turaqtaldy. Sý basqan saiajai aýmaqtaryna monitoring júrgizý jalǵasýda. Tótenshe jaǵdailar jáne politsiia departamentiniń qyzmetkerleri birlesip, sý basqan aýmaqtardy patrýldeýde.
Kómekke kelgen Aqtóbe, Túrkistan oblystary tótenshe jaǵdailar departamentteriniń jeke quramynan qurylǵan jiyntyq toptardyń kúshteri men quraldary Jaiyq ózeniniń boiynda ornalasqan eldi mekenderde sý tasqynyna qarsy is-sharalar júrgizý úshin Batys Qazaqstan oblysynan Atyraý oblysyna jiberildi", -dep otyr maman Ortalyq Kommýnikatsiialar Qyzmetinde ótken brifingte .
Sonymen qatar Asqar Shárip Atyraý oblysynda Jaiyq ózeniniń monitoringi jalǵasyp jatqanyn, sýdyń deńgeii kóterilgenin málimdedi.
"Sý tasqynynan qorǵaý maqsatynda Atyraý qalasynda bógetterdi nyǵaitý jumystary úzdiksiz júrgizilip jatyr. Búgingi tańda uzyndyǵy 240 km qorǵanys bógetterin nyǵaitý júrgizildi. Buǵan deiin kómekke kelgen kúshter men quraldar ýchaskelerge bólinip, qajetti jumystardy atqarýda", -dep aitty TJM ókili.
Soltústik Qazaqstan, Atyraý jáne Aqtóbe oblystarynda 6 082 turǵyn úi men 2 584 aýla aýmaǵynan sýdyń baǵyty burylyp, sý soryldy. Respýblika boiynsha 35 122 adam óz úilerine oraldy. 8 520 adam evakýatsiialaý pýnktterinde. Avariialyq-qutqarý jáne sý tasqynyna qarsy jumystarǵa 25 myńnan astam adam, 3 myń tehnika, 634 sý sorý quraly, 268 júzý quraly, 14 áýe kemesi jumyldyryldy.
