Jaiyq ózeniniń deńgeii biyl 340 santimetrge deiin kóterilýi yqtimal. Bul ótken jylǵydan bir metrge joǵary, dep habarlaidy "Ult aqparat".
BQO Tabiǵi resýrstar jáne tabiǵat paidalanýdy retteý basqarmasynyń basshysy Rinat Sháýenovtiń brifingte málim etkenindei, ózendegi sý qorynyń 80 paiyzy Resei aýmaǵynda qalyptasady.
Ótken jyly Jaiyq ózeniniń tasý shegi tirkelgen 26 sáýir kúni Oral qalasy tusynda 240 santimetr bolǵan edi. Biyl 5 mamyrdyń ózinde 285 santimetrge jetti.
«Reseiden alynǵan derekke qaraǵanda, Jaiyq pen onyń salasy Saqmarda tasý shegi 3 mamyr kúni boldy. Sondyqtan sýdyń 10-12 kún boiy aǵyp keletinin, Jaiyqtyń deńgeii táýlik saiyn 7-8 santimetrge kóterilip jatqanyn eseptegende, 12-15 mamyrǵa qarai 340 santimetrge jetedi dep otyrmyz. Basty maqsat – sý qoimalaryn barynsha toltyryp alý. Sonyń ishinde eń bastylary – Kirov, Bitik, Dóńgelek jáne Piatimar sý qoimalary. Sosyn basqa arnalarǵa sý jiberýdi retteýge bolady. Barlyǵy 260 mln tekshe metr sý qajet bolsa, sonyń 57 paiyzy jinaldy. Qazirdiń ózinde Kirov sý qoimasy 60 paiyzǵa, 107 tekshe metr sý jinalatyn eń iri Bitik sý qoimasy 50 paiyzǵa toltyryldy. Biyl Jaiyq ózeniniń tasýy uzaqqa sozylǵandyqtan, bul jumystar sý deńgeii túskenge deiin jalǵasatyn bolady», - dedi R.Sháýenov.
«Qazsýshar» RMK BQO filialynyń direktory Nurbolat Jumaǵalievtiń aitýynsha, óńirde sý tapshylyǵy máselesin sheshý jumystary jasalýda. Mysaly, Shaǵan ózeninde qaqpa ótken jyly 5-6 sáýirde jabylǵan edi. Biyl sý tapshylyǵyna bailanysty 3 naýryzda bekitilip, mundaǵy qoimaǵa 80 paiyz sý jinaldy.
Qaraózen men Saryózenge Saratov oblysynan biyl 57 mln tekshe metr sý alýǵa kelisimshart jasalyp, respýblikalyq biýdjetten qarajat bólindi. 1 mamyrdan bastap Qaraózenge sekýndyna 2 tekshe metr, Saryózenge 1 tekshe metr sý alynýda.
Sol sekildi Jánibek sýlandyrý júiesine Volgograd oblysynan 22 mln tekshe metr sý alý josparlandy. 11 mamyrdan bastap Jánibek sý sorǵy stansasy iske qosylyp, sý alý bastalady.
«Jánibek pen Bókei ordasy aýdandaryn jaz boiy sýmen qamtý úshin 22 mln tekshe metr sý jetpeidi, áli 6 mln tekshe metr sý qajet. Sondai-aq Qaraózen men Saryózenge qosymsha 28 mln tekshe metr sý alý kerek. Úkimet pen ministrliktiń nazaryna usynylǵan bul másele sheshimin tapsa, Bókei ordasy, Jánibek, Qaztalov, Jańaqala aýdandary sýmen qamtylady», dedi N.Jumaǵaliev.
Múmkindik bolǵan jaǵdaida Jaiyq ózeninen Kirov-Shejin kanaly arqyly Qaraózenge sý jiberý kózdelýde. Oblysta kanaldardy tazartý jumystary da júrgizilýde.
