Jaiyq ózeniniń sýyna keshendi zertteý júrgizildi. Ǵylymi zertteýdiń nátijesin QR Premer-Ministriniń orynbasary Roman Skliar tanystyrdy, dep habarlaidy QazAqparat.
«2021-2024 jyldarǵa arnalǵan Qazaqstan-Resei arasyndaǵy Jaiyq ózeni basseini transshekaralyq sý nysandaryn qoldaný jáne qorǵaý týraly yntymaqtastyq baǵdarlamasy aiasynda «Jaiyq transshekaralyq ózeni basseinindegi aǵyndy retteýdiń saldaryn ekologiialyq baǵalaý jáne ózendi saqtaý men qalpyna keltirý jóninde ǵylymi negizdelgen usynystardy ázirleý» taqybyrynda ǵylymi zertteý júrgizýdiń tehnikalyq tapsyrmasy ázirlendi», - delingen Roman Skliardyń depýtattyq saýalǵa berilgen jaýabynda.
Onyń aitýynsha, Jaiyq ózeniniń lastanýy men onyń ekologiialyq jaǵdaiynyń nasharlaý sebebin anyqtaý maqsatynda keshendi zertteý jumysy júrgizilgen.
«BQO jáne Aqtóbe oblysy aýmaǵyndaǵy sý sapasyna júrgizilgen keshendi zertteýdiń nátijesinde 4 jáne 5-shi sanatqa, al Atyraý oblysyndaǵy sýdyń sapasy 1-4 sanatqa jatatyny anyqtaldy. Sol sekildi zertteý barysynda atmosferalyq synama alynyp, nátijesi boiynsha aýany lastaityn qaldyq zat anyqtalmady. Odan bólek, ótken jyly qazan aiynda Jaiyqtaǵy sý sharýashylyǵy jaǵdaiyn jaqsartý maqsatynda biryńǵai jol kartasy ázirlenip, bekitildi», - deidi ol.
Premer-Ministr orynbasary Jaiyq ózeniniń ekologiialyq ahýalyn retteýge qatysty sharalar Qazaqstan men Reseidiń ortaq baǵdarlamasy aiasynda ekijaqty júrip jatqanyn aitty.
«Biyl 3 aqpanda Jaiyq ózenine qatysty biryńǵai jol kartasy aiasynda qazaqstandyq sarapshylardyń jumys kestesi, ýaqyty men uiymdastyrý formatyna qatysty is-sharalar bekitildi. Úshinshi baǵyt boiynsha Jaiyq ózeninde bekire sanyn arttyrý, kanaldar men sý júielerin qaita jańartý, ózen arnasyn bekite túsip, ózen jaǵasynda ormandy qalpyna keltirý qarastyrylǵan. Odan bólek ózen túbin tereńdetý, tazartý jumysy jáne basqa da is-sharalar josparlanǵan», - dedi Roman Skliar.
