Qazaqstanda áleýmettik qoldaý júiesi ózgerip, kómek azamattardyń tabysy men naqty qajettiligine qarai kórsetiledi. Premer-ministr Oljas Bektenov aýqatty azamattar memleket kómegine súienbei, óz kúshine senýi kerek ekenin aitty, dep habarlaidy ult.kz.
Úkimet basshysynyń aitýynsha, áleýmettik qamsyzdandyrý júiesin reformalaý jumysy jalǵasyp jatyr. Jańa qaǵidat 2027 jylǵy 1 qańtardan bastap tolyq qoldanysqa engizilmek.
«Kópbalaly otbasylardyń tabysy joǵary nemese tómen ekenine qaramastan, olardyń barlyǵy memleketten birdei qoldaý alyp otyr. Bizdiń oiymyzsha, bul – ádiletti emes. Ózin-ózi qamtamasyz etýge múmkindigi bar aýqatty azamattar memleket kómegine súienbei, óz kúshine senýi kerek. Memleket tek ómirlik jaǵdaiyna bailanysty óz kúnin ózi qamtamasyz ete almaityn azamattarǵa qoldaý kórsetedi», – dedi Oljas Bektenov Quryltai otyrysynda.
Premer-ministr memlekettik kómektiń maqsaty azamattardyń turaqty tabys taýyp, ekonomikalyq belsendi bolýyna yqpal etý ekenin atap ótti. Iaǵni áleýmettik qoldaý alǵan azamattar ýaqyt óte kele ózderin ózderi qamtamasyz etip, kómekke muqtajdar qatarynan shyǵýy kerek.
Úkimettiń málimetinshe, áleýmettik qoldaý júiesin ózgertý nátijesinde únemdeletin 700 mlrd teńge jáne 2,5 trln teńge áleýmettik mańyzy bar basqa baǵyttarǵa, sonyń ishinde áleýmettik infraqurylymdy jańǵyrtýǵa jumsalady.
