Qairat Nurtastyń Shymkenttegi kontsertin uiymdastyrǵan kúdikti eki aiǵa úiqamaqqa jiberildi. Bul týraly qalalyq prokýratýranyń baspasóz qyzmeti málimdedi, dep habarlaidy ult.kz.

Tergeý soty uiymdastyrýshyny qamaýda ustaýǵa sanktsiia berýden bas tartyp, oǵan qatysty úiqamaq túrindegi bultartpaý sharasyn tańdaǵan.

Prokýratýra sottyń bul sheshimine narazylyq keltiretinin habarlady.

Eske salaiyq, 10 qazanda Shymkenttegi Qajymuqan Muńaitpasov atyndaǵy stadionda Qairat Nurtastyń «Sahnada 20 jyl» kontserti ótken. Kórermender arasynda qysylyp qalǵan 18 jastaǵy boijetken aýyr jaraqat alyp, jansaqtaý bólimine jetkizilgen. Politsiianyń aldyn ala málimetinshe, satylǵan biletter sany kontsert alańynyń syiymdylyǵynan asyp ketken. Osy oqiǵadan keiin kontsert uiymdastyrýshysy ustalyp, tergeý bastalǵan.

Qairat Nurtas kim?

Qairat Nurtas — qazaqstandyq estrada ánshisi. Tolyq aty-jóni — Qairat Nurtasuly Aidarbekov. Ol 1989 jylǵy 25 aqpanda Túrkistan qalasynda dúniege kelgen. «Nurtas» — ákesiniń esiminen alynǵan sahnalyq aty. Óner jolyn bala kezinen bastaǵan ánshi elimizdiń túrli óńirinde kontsert berip, kópshilikke tanyldy.

Ákesi — Nurtas Aidarbekov, anasy ári prodiýseri — Gúlzira Aidarbekova. Repertýarynda «Aýyrmaidy júrek», «Meili», «Almaty túni» sekildi tanymal ánder bar. Qairat ánshilikpen qatar kinoǵa da túsken: 2013 jyly onyń qatysýymen «Ókinish» filmi jaryq kórdi. Jubaiy — aktrisa Juldyz Ábdikárimova.