Qaraǵandy oblysyndaǵy Jáirem taý-ken kombinatynda bolǵan janjaldan keiin politsiia tergeý bastady. Jergilikti biliktiń dereginshe, 12 tamyzda bolǵan janjaldan sheteldik birneshe jumysshy «azdap jaralanǵan». Politsiia bul oqiǵa boiynsha Qylmystyq kodekstiń «Buzaqylyq» babymen is qozǵalǵanyn habarlady.
Qaraǵandy politsiia departamentiniń málimdemesinde qazir Jáiremde «jaǵdai rettelgeni, politseiler baqylaýǵa alǵany» jazylǵan. Al departamenttiń baspasóz qyzmeti tergeý qupiialyǵyna siltep, «organdar Jáiremde ne bolǵanyn anyqtaidy» dep málimdedi.
12 tamyzda janjal shyqqan Jáiremge Qaraǵandy oblysy ákimdiginiń ókilderi barǵan. Ákimdik janjal sebebin jáne jaralaǵandardyń qai el azamaty ekenin ashyp aitpady. Qaraǵandy oblysy ákimdigi Jáiremge oblys ákimi Erlan Qoshanovtyń barǵanyn, «jaǵdai rettelgenin» ǵana habarlady.
Eski Jáirem jáne Jańa Jáirem eldimekenderiniń turǵyndarynyń aitýynsha, dúisenbi keshkisin jáne 13 tamyz tańerteń sheneýnikter jinalys ótkizip, jurtty sabyrǵa shaqyrǵan. Aty-jónin aitqysy kelmegen turǵyndar janjaldyń jalańash qyzdyń sýretinen shyqqanyn aitsa, endi biriniń sózinshe, jergilikti jumysshylar kombinatta sheteldik jumysshylardyń istegenine qarsy shyqqan.
Jáirem turǵyndary aimaqta jaǵdai tynyshtalǵanyn rastady. Biraq turǵyndar jergilikti jastardyń jumys tabý máselesi, eldimekendegi áleýmettik jaǵdai áli sheshilmegenin aitady.
Buǵan deiin 1200 adam turatyn Eski Jáirem kentiniń turǵyndary ózderin kenish mańynan basqa jaqqa kóshirýdi ia densaýlyqtaryna zalal keltirgeni úshin ótemaqy tóleýdi talap etken edi.
«Qaztsink» kompaniiasyna tiesili Jáiremdegi kombinat resmi jaýap ta bermedi.
Bul — Qazaqstanda sheteldik jumysshylar men jergilikti jumysshylar arasynda týǵan biylǵy ekinshi janjal. 29 maýsymda Atyraý oblysyndaǵy Teńiz kenti jumysshylary arasynda janjal shyǵyp, kem degende 40 adam zardap shekken. Livan men Iordaniia basylymdary qaqtyǵystan soń júzdegen azamatynyń Qazaqstannan qaitqanyn jazǵan.
