Foto: Májilis
Májilis depýtaty Elnur Beisembaev palata otyrysynda úkimettiń qarjy-ekonomikalyq blogy men Ulttyq banktiń valiýta saiasatyna qatysty ustanymyn qatań synǵa aldy.
Ol dollar baǵamynyń kúrt ósýine bailanysty sheneýnikterdiń ony «jai ǵana san» dep ataǵan málimdemesine narazy boldy.
"Jaqynda birqatar sheneýniktiń dollar men teńge arasyndaǵy aiyrbas kýrsy – bul "jai ǵana san" dep aitqan málimdemesi bolashaqtaǵy qarjylyq saldardy elemeidi. Biz túsinýimiz kerek, turmysy tómen, jalaqydan jalaqyǵa ómir súretin adamdardyń sany sarapshylarǵa qaraǵanda myń ese kóp. Olar úshin dollardyń joǵary kýrsy tiimdi. Osy kezde zańdy suraq týyndaidy. Úkimet kimniń jaǵynda? Qarapaiym adamdardyń jaǵynda ma, álde oligarhtardy qoldai ma?" – dep surady Beisembaev májilis otyrysynda.
Budan bólek depýtat Beisembaev kóp nesie alý máselesine de narazylyq bildirdi.
"Shyǵyndarymyzdyń úshten biri qaryzdar esebinen jabylady. Memlekettik jáne úkimettik qaryzdardy óteýge arnalǵan shyǵyndar úsh jylda 6 trillion teńgeden asyp ketedi. Al qaryzdardyń kóp bóligi kvazimemlekettik sektor arqyly parlamentti ainalyp ótip alynady. Biyl syrtqy qaryz 166 milliard dollardan asty, jyl basynan beri 3 milliard dollarǵa ósti. Iaǵni, syrtqy qaryzymyz eldiń tórt jyldyq biýdjetine teń", – dep atap ótti Elnur Beisembaev.
Ol úkimet jańa tabys kózderin izdeýge baǵyttalǵan naqty sharalar qabyldamai otyrǵanyna nazar aýdardy.
