«Jasyl ekonomikaǵa» kóshý jaiy talqylandy

Úkimet úiinde Premer-Ministr Baqytjan Saǵyntaevtyń tóraǵalyǵymen Qazaqstan Prezidenti janyndaǵy «Jasyl ekonomikaǵa» kóshý jónindegi keńes otyrysy ótti, dep habarlady Premer-Ministrdiń baspasóz qyzmeti.

Otyrys barysynda Qazaqstan Respýb­likasynyń «Jasyl ekonomikaǵa» kóshý jónindegi 2013-2020 jyldarǵa arnalǵan tujy­rym­damasynyń Is-shara josparyn oryndaý boiynsha jumys toptarynyń esepteri tyńdaldy. Energetika ministri Q.Bozym­baev, Investitsiialar jáne damý ministri J. Qasymbek jáne Aýyl sharýashylyǵy birinshi vitse-ministri Q. Aitýǵanov baiandama jasady.

Sondai-aq, Astanada «jasyl» tehnolo­giialar men investitsiialyq jobalardyń Halyq­aralyq ortalyǵyn qurý boiynsha másele talqylandy. Tujyrymdamaǵa sáikes, orta­lyqtyń negizgi mindeti Qazaqstannyń «jasyl ekonomikaǵa» tájiribelik kóshýine járdem­desý, jańartylatyn energiia kózderi jáne eko­logiialyq taza tehnologiialar siiaqty «jasyl ekonomika» salalaryn damytýǵa qajetti turaqty negizdi qalyptastyrýǵa qoldaý kórsetý, sondai-aq, halyqaralyq yntymaqtastyqty nyǵaitý. Atap aitqanda, ortalyq «jasyl» tehnologiialar transferti boiynsha elderdiń ózara is-qimylyn qamta­masyz etedi.

Otyrys qorytyndysy boiynsha Premer-Ministr Baqytjan Saǵyntaev birqatar tapsyrma berdi.

Eske salsaq, Qazaqstan Prezidenti janyndaǵy «Jasyl ekonomikaǵa» kóshý jónindegi keńes Memleket basshysynyń Jarlyǵymen 2014 jylǵy 26 mamyrda quryldy. Keńes tóraǵasy Premer-Ministr bolyp tabylady. Keńes Qazaqstan Respýblikasynyń «Jasyl ekonomikaǵa» kóshý jónindegi tujyrymdamasyn júzege asyrýǵa monitoring júrgizý jáne baǵalaý, monitoring júrgizý jáne baǵalaý negizinde sáikes usynymdar jasaý, «jasyl» jáne turaqty damý qaǵidalarymen ekonomikany jańǵyrtýdy qamtamasyz etetin tujyrymdamany júzege asyrý strategiiasyn, tásilin jáne tetikterin anyqtaý maqsatynda qurylǵan konsýltativtik-keńesshi organ bolyp tabylady.