Biyl elorda irgesinde 890 myń 151 túp aǵash otyrǵyzyldy. Bul týraly Nur-Sultan qalasy aktivter jáne memlekettik satyp alý basqarmasynyń basshysy Ersin Ótebaev málim etti, dep habarlaidy QazAqparat tilshisi.
«Elbasynyń bastamasymen qolǵa alynǵan «Jasyl beldeý» jobasy jalǵasyn taýyp keledi. Nur-Sultan qalasynyń mańyn ormanǵa ainaldyrý jumysy jalǵasyp jatyr. Osy oraida biyl qala biýdjetinen «Jasyl beldeý» jobasyna 2 mlrd 95 mln teńge bólindi. Ol qarajatqa 890 myń 151 túp aǵash otyrǵyzyldy. Aǵash otyrǵyzylǵan jerdiń aýmaǵy 838 gektardy quraidy», - dedi Ersin Ótebaev qalalyq máslihattyń qoǵamdyq keńesiniń otyrysynda.
Basqarma basshysynyń aitýynsha, atalǵan baǵyttaǵy jumys aldaǵy jyldary jalǵasyn tabady.
«Sonymen qatar qala ishin de kógaldandyrý jumysy qarqyndy júrip keledi. Ol úshin «Astana-Zelenstroi» JShS-ne 1 mlrd 623 mln teńge bólinip, oǵan 40 birlik tehnika men 72 birlik qosymsha jabdyq satyp alyndy. Biyl ol somanyń 562 mln teńge igerildi. Qalǵany jospar boiynsha 2026 jylǵa deiin júzege asady», - deidi ol.
