Búgin Parlament Májilisiniń jalpy otyrysynda depýtat Daniia Espaeva daryndy jastardyń shetelge ketýine qoldanystaǵy granttardy bólý júiesi sebep bolyp otyrǵanyn málim etti, dep habarlaidy QazAqparat.
«Ókinishke qarai, UBT men granttardy taǵaiyndaýdyń daýly sipaty, sondai-aq osymen bailanysty emotsiialyq kúizelister jyldar boiy jalǵasyp keledi jáne ol sozylmaly máselege ainaldy. Sonymen qatar bul jaǵdai kóptegen jastardy qajetsiz mashaqattan ainalyp ótý maqsatynda basqa da joldardy izdestirýge itermelep otyr. Oǵan qosa, osyndai múmkindikterdi, iaǵni memlekettik granttardy Reseidiń, Chehiianyń, Qytaidyń jáne basqa da elderdiń joǵary oqý oryndary usynyp otyrǵanyn umytpaýǵa tiispiz», - dep toqtaldy ol.
Osy oraida depýtat keibir málimetterge toqtala kele, tek biyldyń ózinde UBT-dan bas tartyp, sheteldik granttar boiynsha bilim alýǵa Qazaqstannyń 40 myń túlegi baǵyt alǵanyn, bul óz kezeginde túlekterdiń 30 paiyzǵa jýyǵy ekenin atap ótti. Bul turǵyda D. Espaeva qoldanystaǵy granttardy bólý júiesi elden talapty jastardyń shetelge qonys aýdarýyn yntalandyryp otyrǵanyn sóz etti.
Onyń paiymynsha, reseilik, eýropalyq jáne qytailyq ýniversitetter UBT-nyń qajetinsiz-aq talapty jastardy iriktep jatyr, sondai-aq olardyń arasyndaǵy kóptegen jas mamandar endi Qazaqstanǵa oralmaýy múmkin.
«Birinshiden, 110 balldan joǵary alǵan, alaida tańdaǵan mamandyǵymen grant ielenbegen talapkerlerge kelesi kezekte UBT boiynsha pánder aiyrmashylyǵyn tapsyrý talabymen bólinbengen granttary bar basqa mamandyqtar boiynsha grant usynǵan durys. Ekinshiden, UBT-dan bólek, qabyldaý emtihany júiesi arqyly joǵary oqý ornyna túsýdiń balamaly nusqalaryn talapkerler tańdaýyna engizý múmkindigin qarastyrǵan jón. Úshinshiden, daryndy ári talapty jastardyń shetelge qonys aýdarýyn toqtatý men ǵalymdar men jas mamandardyń elge oralýyn yntalandyratyn baǵdarlamany ázirleý kerek», - dedi depýtat.
