QR Bilim jáne ǵylym vitse-ministri Bibigúl Asylova jastardyń bilim izdep, shetelge ketpeýi úshin atqarylyp jatqan jumystardy baiandady, dep habarlaidy QazAqparat tilshisi.
«2017-2018 oqý jylynda 139 316 túlek mektep bitirgen. Onyń 69 paiyzy nemese 96 myńǵa jýyǵy UBT-ǵa qatyssa, qalǵan 31 paiyzy nemese 43 myń bala testileýge qatyspady. UBT tapsyrǵandardyń 87 paiyzy, iaǵni 84 217 túlek Qazaqstan JOO-laryna qabyldandy. Respýblika kolledjderine 26 990 bala tústi», - dedi vitse-ministr «Nur Otan» partiiasy ortalyq apparatynda ótken jastardy qoldaý týraly komissiia otyrysynda.
Ákimdikter tarapynan qosymsha 1919 grant bólingen. Bul da túlekterdiń ózge elge attanbai, elde qalýyna septigin tigizbek.
«Iaǵni, óńirdegi ákimdikter qosymsha grant bólý arqyly túlekterdiń shetelge ketýiniń aldyn alýda. Prezident tapsyrmasymen memlekettik bilim berý tapsyrysyn 20 myńǵa kóbeittik. Áitse de, shetelge ketken stýdentterdiń tizimi bar. Atap aitqanda, Resei Federatsiiasynyń JOO-laryna 8 myń qazaqstandyq qabyldanǵan, onyń 5 197-si Reseidiń bilim grantymen oqyp jatyr, qalǵan 2 808-i aqyly negizde. 598 qazaqstandyq abitýrient Resei kolledjderine túsken. Odan bólek, 3 myńǵa jýyq qazaqstandyq alys-jaqyn shetelderge oqýǵa ketken», - dedi B. Asylova.
Onyń aitýynsha, jastardy elde qaldyrý úshin memlekettik bilim grantyn kóbeitý men stýdentterdiń jaily ómir súrýine jaǵdai jasaýdan bólek, bilim sapasyn jaqsartýǵa da nazar aýdarǵan jón.
«Ministrlik te, ýniversitetter de bul baǵytta jumys istep jatyr. Birinshiden, «Atameken» kásipkerler palatasy mamandyqtar boiynsha JOO-lar reitingin jasady. Jyl sońyna deiin taǵy qosymsha mamandyqtar boiynsha tizim jariialanady. Bolashaq abitýrientter men stýdentter osy reitingti qarap, eń úzdik qazaqstandyq JOO-lardy tańdai alady», - dedi Bibigúl Asylova.
.jpeg)