قر بٸلٸم جەنە عىلىم ۆيتسە-مينيسترٸ بيبٸگٷل اسىلوۆا جاستاردىڭ بٸلٸم ٸزدەپ, شەتەلگە كەتپەۋٸ ٷشٸن اتقارىلىپ جاتقان جۇمىستاردى باياندادى, دەپ حابارلايدى قازاقپارات تٸلشٸسٸ.
«2017-2018 وقۋ جىلىندا 139 316 تٷلەك مەكتەپ بٸتٸرگەن. ونىڭ 69 پايىزى نەمەسە 96 مىڭعا جۋىعى ۇبت-عا قاتىسسا, قالعان 31 پايىزى نەمەسە 43 مىڭ بالا تەستٸلەۋگە قاتىسپادى. ۇبت تاپسىرعانداردىڭ 87 پايىزى, ياعني 84 217 تٷلەك قازاقستان جوو-لارىنا قابىلداندى. رەسپۋبليكا كوللەدجدەرٸنە 26 990 بالا تٷستٸ», - دەدٸ ۆيتسە-مينيستر «نۇر وتان» پارتيياسى ورتالىق اپپاراتىندا ٶتكەن جاستاردى قولداۋ تۋرالى كوميسسييا وتىرىسىندا.
ەكٸمدٸكتەر تاراپىنان قوسىمشا 1919 گرانت بٶلٸنگەن. بۇل دا تٷلەكتەردٸڭ ٶزگە ەلگە اتتانباي, ەلدە قالۋىنا سەپتٸگٸن تيگٸزبەك.
«ياعني, ٶڭٸردەگٸ ەكٸمدٸكتەر قوسىمشا گرانت بٶلۋ ارقىلى تٷلەكتەردٸڭ شەتەلگە كەتۋٸنٸڭ الدىن الۋدا. پرەزيدەنت تاپسىرماسىمەن مەملەكەتتٸك بٸلٸم بەرۋ تاپسىرىسىن 20 مىڭعا كٶبەيتتٸك. ەيتسە دە, شەتەلگە كەتكەن ستۋدەنتتەردٸڭ تٸزٸمٸ بار. اتاپ ايتقاندا, رەسەي فەدەراتسيياسىنىڭ جوو-لارىنا 8 مىڭ قازاقستاندىق قابىلدانعان, ونىڭ 5 197-سٸ رەسەيدٸڭ بٸلٸم گرانتىمەن وقىپ جاتىر, قالعان 2 808-ٸ اقىلى نەگٸزدە. 598 قازاقستاندىق ابيتۋريەنت رەسەي كوللەدجدەرٸنە تٷسكەن. ودان بٶلەك, 3 مىڭعا جۋىق قازاقستاندىق الىس-جاقىن شەتەلدەرگە وقۋعا كەتكەن», - دەدٸ ب. اسىلوۆا.
ونىڭ ايتۋىنشا, جاستاردى ەلدە قالدىرۋ ٷشٸن مەملەكەتتٸك بٸلٸم گرانتىن كٶبەيتۋ مەن ستۋدەنتتەردٸڭ جايلى ٶمٸر سٷرۋٸنە جاعداي جاساۋدان بٶلەك, بٸلٸم ساپاسىن جاقسارتۋعا دا نازار اۋدارعان جٶن.
«مينيسترلٸك تە, ۋنيۆەرسيتەتتەر دە بۇل باعىتتا جۇمىس ٸستەپ جاتىر. بٸرٸنشٸدەن, «اتامەكەن» كەسٸپكەرلەر پالاتاسى ماماندىقتار بويىنشا جوو-لار رەيتينگٸن جاسادى. جىل سوڭىنا دەيٸن تاعى قوسىمشا ماماندىقتار بويىنشا تٸزٸم جارييالانادى. بولاشاق ابيتۋريەنتتەر مەن ستۋدەنتتەر وسى رەيتينگتٸ قاراپ, ەڭ ٷزدٸك قازاقستاندىق جوو-لاردى تاڭداي الادى», - دەدٸ بيبٸگٷل اسىلوۆا.
.jpeg)