QR Parlamenti Májilisiniń tóraǵasy Nurlan Nyǵmatýlin baǵdarlamalardyń oryndalýyna bailanysty tiisti memorgandardyń jaýapkershiligin arttyrý máselesin kóterdi, dep habarlaidy "Ult aqparat".
Aita keteiik, búgin Parlament Májilisiniń jalpy otyrysynda «2019-2021 jyldarǵa arnalǵan respýblikalyq biýdjet týraly» QR Zańyna ózgerister engizý týraly» zań jobasyn talqylaý kezinde «Jas maman» jobasynyń oryndalýy barysyna nazar aýdardy.
N. Nyǵmatýlin jyl basynda, iaǵni Jastar jylynyń ashylýy rásiminde Elbasy «Jas maman» baǵdarlamasyn daiyndaý úshin Úkimetke tiisti tapsyrmalar bergenin eske saldy. Alaida osy baǵyttaǵy qajetti sharalar iske asyrylmaǵan.
Osy oraida, Májilis tóraǵasy qujatty daiyndaý men kelisýdiń uzaq rásimderin synǵa aldy.
«Tapsyrmany oryndamaýdyń sebebiniń ózi narazylyq týdyrady, iaǵni bul jaǵdai baǵdarlamany júzege asyrý tártibin daiyndaý men kelisý kezindegi jai ǵana qaǵazbastylyqpen túsindirilip otyr. Bir qujatty kelisý sharalaryna 9 ai merzim jumsalǵan. Bir ǵana buiryqty daiyndaýǵa osynshama ýaqyt ketti. Meniń oiymsha, bul jait jastardyń múddesin qamtityn mańyzdy baǵdarlamany júzege asyrý kezine biýrokratiialyq áýre-sarsańnyń jarqyn úlgisin kórsetip otyr. «Jastar jyly» bolsa aiaqtalýǵa taiap qalǵanda, sizder endi ǵana oianyp jatyrsyzdar», - dedi Nurlan Nyǵmatýlin.
