Foto: IIM resmi saitynan
Ishki ister ministrligi jastar arasyndaǵy bopsalaý faktileriniń jolyn kesti, -dep habarlaidy "Ult Aqparat".
Ishki ister ministrligi toptyq bopsalaý qylmystaryn anyqtaý jáne olardyń jolyn kesý boiynsha jumysty júieli túrde júrgizip keledi. Ásirese jastar arasyndaǵy paidakúnemdik piǵylmen ǵana emes, sonymen qatar erekshe dórekilikpen, menmendikpen jasalatyn, keide qoǵamdyq rezonans týdyratyn jaǵdailar erekshe baqylaýda, -dep habarlaidy vedomstvo.
– Ulytaý oblysynda uiymdasqan qylmysqa qarsy kúres basqarmasynyń qyzmetkerleri 18-20 jas aralyǵyndaǵy jastar tobyn ustady. Olar jergilikti kolledjdiń kámeletke tolmaǵan stýdentterin qorqytyp, aqsha bopsalaǵan. Kúdiktiler ózgelerdi qorqytý jáne ózderiniń basymdylyǵyn kórsetý úshin zorlyq-zombylyq áreketterin beinejazbaǵa túsirgen. Bopsalaý jáne buzaqylyq faktileri boiynsha qylmystyq ister sotqa joldandy, – dedi QR IIM uiymdasqan qylmysqa qarsy kúres departamentiniń ókili Qýandyq Alpys.
Pavlodar oblysynyń politsiia departamenti uiymdasqan qylmysqa qarsy kúres basqarmasy prokýratýranyń úilestirýimen aǵymdaǵy jyldyń mamyr aiynda jastardy bopsalaýmen ainalysqan toptyń áreketine tosqaýyl qoidy. Top múshelerine osyndai 10 faktige qatysy bar degen aiyp taǵylyp otyr. Olar jábirlenýshilerdi qorqytyp, 2 mln teńgege deiin alǵan. Jábirlenýshiler qylmyskerlerden qorqyp, quqyq qorǵaý organdaryna júginbegen.
Zańsyz áreketterdiń saldarynan jábirlenýshiler sýitsid jasaýǵa deiin barǵanyn atap ótken jón. Osyndai oqiǵalardyń birinde qorlyq pen soqqyǵa shydamaǵan 22 jastaǵy jigit ózin-ózi óltirýge oqtalǵan.
Top múshelerin ustaý kezinde olardan travmatikalyq jáne sýyq qarý, sondai-aq sintetikalyq esirtki tárkilendi. Barlyq kúdikti qamaýǵa alyndy. Jábirlenýshilerge qatysty qaýipsizdik sharalary qabyldandy. Qylmystyq kodekstiń birneshe baby boiynsha sotqa deiingi tergep-tekserý júrgizilip jatyr.
