Túrkistan oblysynda jasóspirimder túsirgen beinejazba uryny ustaýǵa kómektesti, – dep habarlaidy "Ult aqparat" Polisia.kz portalyna silteme jasap.
Jetisai aýdandyq politsiia bólimine jergilikti turǵyn aryzdanǵan. Áieldiń aitýynsha, kúndizgi ýaqytta onyń úiine ury túsip, altyn júzik, altyn bilezik jáne 13 myń teńge aqshasyn jymqyryp ketken. Jábirlenýshige 150 myń teńge materialdyq shyǵyn kelgen.
"Atalǵan derek birden QR QK-niń 188-baby (Urlyq) boiynsha tirkeýge alyndy. Dál osyndai aryzben politsiiaǵa taǵy birneshe turǵyn habarlasty. Onyń biri 80 myń teńge aqshasy men 150 myń teńge bolatyn altyndaryn belgisiz bireý qoldy etkenin kórsetken. Al kelesi turǵyn bolsa, úiine jasyryn kirmekshi bolǵan uryny baiqap qalǵanyn, alaida urynyń qashyp ketkenin jetkizgen.
Turǵyndardyń jiǵanyn jymqyryp, mazasyn qashyrǵan uryny anyqtap, qylmysty ashý maqsatynda tártip saqshylary jan-jaqty tekserý amaldaryn júrgizdi. Jaqyn aýmaqtardy túgel qarap shyqty. Kórgen-bilgenderden surastyrdy. Sonyń nátijesinde kórshileriniń qaqpasy qulyp tursa da, úiinde adam tyǵylyp otyrǵanyn túsirip alǵan jasóspirimderdiń beinejazbasyn nazarǵa aldy. Osy arqyly kúdiktiniń jeke basyn anyqtap, ustaldy" - delingen aqparatta.
Ol Qyzylorda oblysynyń turǵyny, jas jigit bolyp shyqty. Belgili bolǵandai, aqsha qajet bolǵan jigit páter urlyǵyn jasaǵan. Iaǵni kúndizgi ýaqytta esigi qulyp turǵan úilerge zańsyz kirip, aqsha men altyndardy jymqyrǵan. Osylaisha onyń 6 birdei urlyqqa qatystylyǵy anyqtaldy, jalpy jábirlenýshilerge keltirilgen shyǵyn kólemi 1 million teńgeni qurady.
Seziktiden aiǵaqty zat retinde altyndardyń bir bóligi tárkilengen. Kúdikti qazirgi tańda qamaýǵa alynyp, tergeý amaldary júrgizilip jatyr.
