Atbasarda jasóspirim ákesiniń keshigýine bailanysty poiyzdyń toqtatý kranyn julyp alǵan, dep habarlaidy QazAqparat.
QR IIM Kóliktegi politsiia departamentiniń baspasóz qyzmeti málim etkenindei, oqiǵa Atbasar stantsiiasynda «Nur-Sultan-Arqalyq» jolaýshylar poiyzyn jóneltý kezinde boldy.
«13 jasar balanyń ákesi poiyz toqtap turǵan kezde shyǵyp, qaita oralýǵa úlgermei qalǵan. Qoryqqan jasóspirim temirjol kóligin toqtatý úshin krandy julyp alǵan», dedi Kóliktegi politsiia departamenti bastyǵynyń birinshi orynbasary, politsiia polkovnigi Qalijan Qoblandin.
Onyń sózine qaraǵanda, balanyń ákesine qatysty QR Ákimshilik quqyqbuzýshylyq kodeksi 560-babyna (temirjol kóligi quraldaryn paidalaný erejesin buzý) sáikes 5 AEK kóleminde aiyppul salyndy.
«Jyl basynan beri departamentte poiyzdy shuǵyl tejeýdiń 367 deregi tirkelgen bolsa, sonyń 12-si toqtatý kranyn julyp alýǵa bailanysty», dedi Qoblandin.
