Foto: Úkimet
Úkimette Premer-ministrdiń orynbasary – ulttyq ekonomika ministri Serik Jumanǵarinniń tóraǵalyǵymen ótkizilgen keńeste salyqtyq jáne kedendik ákimshilendirý júielerin tsifrlandyrý jónindegi jumystardyń barysy tyńdaldy, dep habarlaidy Ult.kz.
Qarjy vitse-ministri Áset Turysovtyń deregi boiynsha, qazirgi ýaqytta fiskaldyq organdardyń aqparattyq júielerine qajetti derekterdi berý úshin Smart Data Finance, SÁAJ jáne Keden salyqtyq aqparattyq júielerin alty memlekettik organnyń aqparattyq júiesimen integratsiialaý jalǵasýda. Jańa Salyq kodeksiniń qoldanysqa engizilýine deiin jańa salyq júiesin engizý boiynsha barlyq testilik jáne basqa da qajetti rásimderdi bitirip úlgerý úshin barlyq integratsiialyq jumysty múmkindiginshe tezirek tiianaqtaý qajet. Keńeste tolyqqandy integratsiiaǵa kedergi keltiretin barlyq másele qaraldy, onyń qorytyndysy boiynsha vitse-premer memlekettik organdarǵa barlyq rásimdik máseleni naýryz aiynyń sońyna deiin aiaqtaýdy tapsyrdy.
Smart Data Finance AJ-ny ónerkásiptik paidalanýǵa berý «e-Tamga» QQS tólem júiesiniń jumysyn bastaý úshin negiz bolady. Bul júie satyp alýshy men jetkizýshi arasynda, sondai-aq biýdjetpen ózara esep aiyrysý kezinde QQS tólemin júrgizýge arnalǵan. Júiedegi QQS boiynsha barlyq tólem tek elektrondyq shot-faktýra negizinde júrgizildi. Bul QQS tóleýden jaltarýdy boldyrmaidy. Osy júieniń arqasynda QQS qaitarý qazirgidei 150 kún emes, 15 kún ishinde júzege asyrylady. Sondai-aq ol adal biznesti josyqsyz táýekeldi kompaniialardan qorǵaýǵa múmkindik beredi.
Budan basqa, Salyqtyq ákimshilendirýdiń integratsiialanǵan júiesiniń (SÁAJ) AJ bazasynda Qarjy ministrligi TsDIAÓM-men birlesip salyq tóleýshilerge qyzmet kórsetýdiń proaktivti servistik modelin qurady. SÁAJ-daǵy salyq tóleýshiniń jeke kabineti salyq tóleýshilerge qyzmetterdi alýǵa jáne eseptilikti qashyqtan tapsyrýǵa, deklaratsiialardy kezeń-kezeńimen, anyqtamalarmen jáne derekterdi tekserýmen toltyrýǵa múmkindik beredi. Júie ekijaqty bailanysty qamtamasyz etedi: memlekettik kiris organynyń habarlamasyna jaýap berýge jáne salyq organyna barmai-aq qujattardy júkteýge bolady.
Qazirgi ýaqytta ekinshi toqsanda aiaqtalýy josparlanǵan SÁAJ modýlderin kezeń-kezeńimen kóbeitý júrip jatyr. Bolashaqta qyzmet kórsetý modeli biryńǵai salyq kómekshisin ázirleý úshin jasandy intellekt kómegimen jetildiriledi. Virtýaldy salyq kómekshisi biznesti ashýdan bastap jabýǵa deiin salyqtyq qoldaýdy qamtamasyz etip, árbir salyq tóleýshige deklaratsiiany aldyn ala toltyrýǵa, qolaily salyq rejimin tańdaý boiynsha usynys berýge, deklaratsiia tapsyrý men salyq tóleý merzimi týraly habarlaýǵa kómektesedi.
Sonymen qatar tutynýshynyń árbir satyp alý úshin fiskaldyq chekterdi talap etýge qatysty óz quqyǵy týraly habardar bolýyn jaqsartý úshin osy kóktemde Qarjy ministrligi Salyq keshbek jobasyn qaita bastaýdy josparlap otyr. Ótken jyly Salyq keshbek pilotty turǵyda Semei qalasy men Aqkól aýdanynda synaqtan ótkizildi. Onyń kómegimen satyp alýshylar fiskaldyq chek berý kezinde satyp alý somasynyń 2%-yn aldy. Pilottyq jobanyń 5 aiynda chekter sany 222%-ǵa, al taýarlar men qyzmetterdiń jalpy quny 132%-ǵa ósti. 75 mln teńge keshbek esepteldi. Áset Turysovtyń habarlaýynsha, 2025 jylǵy 15 naýryzdan bastap bul jobany Óskemen (ShQO), Jetiqara (Qostanai oblysy) jáne Jaqsy aýdanyna (Aqmola oblysy) keńeite otyryp, qaita bastaý josparlanyp otyr.
