2001
*1 mamyrda Almatyda Qazaqstan halqy dostyǵynyń festivali bastaldy. Táýelsizdiktiń 10 jyldyǵy aiasynda ótken bul sharany Elbasy Nursultan Nazarbaev ashyp, barshaǵa bereke, birlik, tatýlyq tiledi. «1995 jyldan memlekettiń mártebeli merekesi bolyp kele jatqan 1 mamyr – barshamyzdyń yntymaǵymyz ben ózara túsinistigimizdi, dostyǵymyz ben baýyrmaldyǵymyzdy jarqyratyp kórsetetin kemel kúnimiz. Qazaqstan – tatýlyǵy jarasqan shańyraq», dedi Memleket basshysy.
*6 mamyrda qazaq ǵaryshkeri Talǵat Musabaev basqarǵan «Soiýz-TM-32» korabli Jerge qaityp oraldy. Tikushaqpen Astana áýejaiyna jetkizilgen ekipaj múshelerimen Elbasy Nursultan Nazarbaev kezdesti. Ekipaj quramynda bort injeneri Iýrii Batýrin men tuńǵysh ǵaryshker-týrist Dennis Tito bar bolatyn.
*9 mamyrda Astanada «Otan qorǵaýshylar» memorialdyq kesheni ashyldy.
*11 mamyrda elordada qazaq halqynyń táýelsizdigi jolyndaǵy uly kúresker – Kenesary hannyń eskertkishi ashyldy. Bul týraly «Egemen Qazaqstan» gazetiniń 12 mamyr kúngi nómirinde «Qazaqta Kenekeme er jetpegen…» taqyrybymen maqala jariialandy.
*18 mamyrda L.N.Gýmilev atyndaǵy Eýraziia ulttyq ýniversitetinde Kúltegin eskertkishiniń ǵylymi kóshirmesi ornatylyp, Qazaqstan táýelsizdiginiń 10 jyldyǵyna arnalǵan «Baiyrǵy túrki órkenieti: jazba eskertkishter» taqyryby boiynsha halyqaralyq ǵylymi-teoriialyq konferentsiia ótti. Oǵan Elbasy qatysyp, sóz sóiledi.
*23 mamyrda Prezident N.Á.Nazarbaevtyń Armeniiaǵa resmi sapary bastaldy. Erteńinde Erevan qalasynda Ujymdyq qaýipsizdik keńesiniń sessiiasy ótkizildi. Sapar barysynda Elbasy Armeniia Prezidenti R.Kocharianmen kelissóz júrgizdi.
*31 mamyrda Prezident Nursultan Nazarbaev Eýraziialyq ekonomikalyq qoǵamdastyq memleketaralyq keńesiniń jáne TMD-ǵa múshe elder basshylary keńesiniń májilisterine qatysý úshin Belarýs astanasyna keldi. Onda negizinen aldyn ala maquldanǵan 18 qujat qaraldy. Erteńine Minskide EýrAzEQ-qa qatysýshy memleketter basshylarynyń májilisi ótti.
*5 maýsymda Qazaqstanda Resei Federatsiiasy mádenietiniń kúnderi bastaldy.
*7 maýsymda Qazaqstan sýdialarynyń sezi ótti. «Bizdiń elimizdiń sýdialary eń basty máselege negizdelgen jańa kózqarastardy taldap jasaidy degen senimdemin: máseleni adamdar ózderiniń quqyqtaryn qorǵaý úshin sheneýnikterge emes, ákimderge emes, Úkimetke emes, Prezidentke emes, sizderge keletindei etip qoiyńyzdar», dedi Prezident sýdialar aldynda sóilegen sózinde.
*12 maýsymda Qazaqstan Premer-ministri Q.Toqaev azamattardyń aqshany jariia etýi jónindegi aktsiiaǵa bailanysty málimdeme jasady. «Raqymshylyq nátijesinde azamattar úshin eshqandai keleńsiz saldar bolmaitynyn málimdeimin. Quqyq qorǵaý organdary tekserý, shuǵyl-izdestirý sharalaryn júrgizý úshin aqshany jariia etý faktilerin paidalanbaityn bolady», dedi Úkimet basshysy.
*13 maýsymda Elbasy N.Á.Nazarbaev Eýropalyq qaita qurý jáne damý bankiniń prezidenti J.Lemerdi qabyldady. Kezdesý barysynda elimizdegi ekonomikalyq reformalar, Qazaqstan men Eýropalyq qaita qurý jáne damý banki arasyndaǵy yntymaqtastyq máseleleri talqylandy.
*14-15 maýsymda Qytaida «Shanhai bestigi» elderiniń altynshy sammiti ótti. Shanhai qalasynda Qazaqstan, Qytai, Qyrǵyzstan, Resei, Tájikstan men Ózbekstan memleketteriniń prezidentteri kezdesip, onda uiymnyń atyn ózgertý kelisildi jáne memleketter basshylary Ózbekstandy «Shanhai yntymaqtastyq uiymyna» qabyldaý týraly Birlesken málimdemege qol qoidy. Osylaisha, Ózbekstannyń múshe bolýyna bailanysty, uiymdy «Shanhai yntymaqtastyq uiymy» retinde qaita qurý týraly sheshim qabyldandy.
*19 maýsymda 184,5 shaqyrymdyq «Aqsý-Degeleń» temir joly iske qosyldy. Prezident Nursultan Nazarbaev jańa joldyń ashylýyna arnaiy qatysyp, sóz sóiledi. Bul týraly «Egemen Qazaqstan» gazetiniń 20 maýsym kúngi nómirinde Elbasy atap kórsetkendei, «Aqsý-Degeleń» temir jolynyń iske qosylýy – táýelsizdik toiyna tamasha tartý» taqyrybymen maqala jariialandy.
*24 maýsymda Astana qalasyndaǵy «Qazaqstan» sport kesheninde Qazaqstan Respýblikasynyń I spartakiadasynyń ashylý saltanaty ótti.
*29 maýsymda Elbasy Jarlyǵymen 2007 jylǵa deiingi kezeńge «Astana – jańa qala» arnaiy ekonomikalyq aimaǵy quryldy.
*1 shildede elde qosymsha qun salyǵy 20-dan 16 paiyzǵa, áleýmettik salyq 26-dan 21 paiyzǵa tómendetildi. Bul elimizde júrip jatqan reformalardyń jarqyn jetistigi edi.
*5 shildede Astanaǵa eki kúndik resmi saparmen Túrikmenstan prezidenti Saparmurat Niiazov keldi. Kelissózderden keiin Qazaqstan men Túrikmenstan prezidentteri memlekettik shekarany aiqyndap alý máseleleri týraly kelisimge, basqa da qujattarǵa qol qoidy.
*18-19 shilde kúnderi Prezident N.Á.Nazarbaevtyń Horvatiia Respýblikasyna tuńǵysh ret resmi sapary ótti. Sapar barysynda Qazaqstan Prezidenti men Horvatiia basshysy Stepan Mesich eki eldiń ózara qarym-qatynasynyń printsipteri týraly deklaratsiiaǵa qol qoidy. Al Syrtqy ister ministrleri yntymaqtastyq týraly memorandým bekitti.
*23 shildede Prezident Nursultan Nazarbaevtyń Qyrǵyz Respýblikasyna resmi sapary bastaldy. El basshylary – Nursultan Nazarbaev pen Asqar Aqaev mańyzdy úsh qujatqa – ekijaqty qarym-qatynasty odan ári damytýǵa baǵyttalǵan birlesken málimdemege, 2001-2005 jyldardaǵy ekonomikalyq yntymaqtastyq týraly kelisimge, Qazaqstan men Qyrǵyzstan arasyndaǵy shekarany delimitatsiialaý týraly kommiýnikege qol qoidy. Osy kúni Bishkektegi Emen saiabaǵynda memleketter basshylarynyń qatysýymen Muhtar Áýezovke eskertkish ashyldy.
*2 tamyzda Elbasy Nursultan Nazarbaev TMD elderi basshylarynyń Qara teńiz boiyndaǵy beiresmi kezdesýlerine qatysty.
.jpeg)